भांगरभूंय | प्रतिनिधी
दिवचल: आमोणें, सांखळे पुला वयल्यान मांडवी न्हंयेंत उडी घेतिल्ल्या मनशाची कूड आखाडा सांतईस्तेंव (कुमारजुंवें) खाडीत सांपडली. दिवचल उजो पालोवपी दळाच्या जवानांनी कूड उदकांतल्यान भायर काडून पोरणें गोंय पुलिसांचे सुवादीन केली. मयताचें नांव संतोष नरसिंह सावंत तळावलीकार (64, रा. तळावली फोंडें) अशें आसा.
मयत संतोष सावंत तळावलीकार हे 17 मार्च सावन बेपत्ता आशिल्ले. ते 17 वेर सकाळीं बाणस्तारी आपल्या चलयेच्या घरांतल्यान कांय कारणा खातीर भायर सरिल्ले. ते परतूंकच नाशिल्ल्यान तांचो सोद सुरू आशिल्लो. त्याच दिसा सकाळीं आमोणें सांखळे पुला वयल्यान एका मनशान न्हंयेंत उडी घेतिल्ल्याचें कोणे तरी पळयलें. ताका लागून ह्या न्हंयेच्या पात्रांत कूड सोदपाची मोहीम सुरू आशिल्ली.
काल (आयतारा) सकाळीं संतोष सावंत तळावलीकार हांची कूड आखाडा सांतईस्तेंव हांगा न्हंयेच्या पात्रांत सांपडली. हाची म्हायती दिवचल उजो पालोवपी दळाक दिले उपरांत दळाचे अधिकारी शैलेश गावडे हांच्या मार्गदर्शना खाला दळाचे उपअधिकारी भारत गांवस हांच्या फुडारपणा खाला गीतेश नायक ह्या जवानान कूड भायर काडली. ह्या कामांत तांकां विशांत वायंगणकार, गौरेश गांवस आनी अनूप नायक ह्या दळाच्या जवानांनी सहकार्य केलें.
दळाच्या जवानांनी कूड भायर काडून पोरणें गोंय पुलिसांचे सुवादीन केल्या. पुलीस ह्या प्रकरणाचाे अदीक तपास करतात. मयत संतोष सावंत तळावलीकार हे केंद्र सरकाराच्या रबर बोर्ड हांगा कामाक आशिल्ले. तांचे घरकान्नीक वर्सभरा पयलीं मरण आयिल्लें. तांकां तीन लग्न जाल्ल्यो धुवो आसात. तांची कूड मरणा उपरांतचे तपासणे उपरांत घरच्यांचे सुवादीन केली. तांचे कुडीचेर काल सांजवेळा निमाणे संस्कार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
