भांगरभूंय | प्रतिनिधी
गोंय हें समाजीक, संस्कृतीक इतिहासीक आदी गजालींचें परिपक्व केंद्रस्थान. इतिहासीक दृश्टीकोनांतल्यान विचार करीत जाल्यार गोंयचो शेकानशेक काळ पुर्तुगेज राजवटी खाला माड्डून उरलो. कितलीशींच झुजां जालीं, संघर्श जाले आनी 449 वर्सां उपरांत गोंयान मुक्तीचो आनी तृप्तीचो श्वास घेतलो. मुळांत जसो काळ मुखार वता, बदल जाता, तशी विचारांची आनी फुडाराची रुपरेशा बदलत वता. 19 डिसेंबर, 1961 वर्सा गोंय मुक्त जालें आनी आशेचीं नवीं किरणां गोंयांत फांकलीं. त्या काळावेली सत्ता, राज्यवेवस्था हांणी तात्कालीन काळाक धरून गोंयच्या सर्वांगीण उदरगती खातीर पावलां उखल्लीं. उपरांत सत्ता बदलत गेल्यो, परिस्थिती मदीं बदल जाता आसतना नवे नवे विचार रुजूंक लागले. फाल्यां गोंय मुक्ततायेक 61 वर्सां पुराय जातात.
जेन्ना खंयचेय गजालीचो फुडाराचे बाबतींत विचार करप जाता तेन्ना ताका योग्य ते दिकेन योग्य ते वेळार वळण हाडपा पासत वावर करप गरजेचो आसता. गोंयच्या फुडाराविशीं येवजण आंखतना गोंयचे वास्तवीक परिस्थितीक धरून फुडाराचे कल्पनेचेर भर दिवप म्हत्वाचें थारता. सहजा मनशांक आपणें कितें केलां हें गिरोवपाक भोव आवडटा. समाजा खातीर, गोंया खातीर दरेक मनीस वावुरता. आनी आपल्या राज्या खातीर वावर करप हें दरेकल्याचें कर्तव्य. संद मेळटा, तेन्ना तेन्ना ते तिचें भांगर करपाक कळपाक जाय. पूण, आमची जापसालदारकी थंयच सोंपना. समाजसंरचनेचो विचार करीत जाल्यार ह्यो गजाली होलमतात. नेणारपण ते जाणटेपण मेरेनचो दरेक अणभव खाशेलो आसता. आनी दरेका अणभवांतल्यान देख घेवन पावल मारप हातूंत शाणेपण आसता.
तरणाटे हो गोंयचो फुडार म्हणटात आनी हें तितलेंच खरें. कारण तरणाट्यां मुखार एक ध्येय आसता, एक संकल्प आसता जो तांच्या विचारांच्या म्हालवजार तयार जाल्लो आसता. तरणाट्यांच्या फुडाराची येवजण ही नकळत गोंयच्या विकासाची बुनयाद थारता. आयज गोंय सगळ्या क्षेत्रांनी तरणाटे वयर सरतना दिश्टी पडटात. शिक्षण, विज्ञान, तंत्रज्ञान सारक्या क्षेत्रांनी तरणाटे तोखणायास्पद वावर करतात. विकासाचीं सगळीं क्षेत्रां तरणाट्यांच्या जिज्ञासू वृत्तीक लागून सुरक्षीत आसात म्हणपाक जाता. गोंय मुक्ती उपरांतची सगळ्यांत व्हडली शक्त म्हणल्यार गोंयाक फावो जाल्ली सक्षम तरणी पिळगी. कारण ह्या वयार तरणाट्यांचें मानस एक आकार घेता आनी ताच्या आदारान विकासाची दूरदृश्टी पळोवन ते वाटचालीचें स्मरण ते करतना दिश्टी पडटात.
गोंयची आयची वास्तवीक परिस्थिती पळयल्यार बरें काय वायट बरोवचें तेंच कळना. गोंयांत केन्ना कितें घडत हें सांगपाक शकनात. कोण मनीस केन्ना धवो आशिल्लो केन्ना भगवो जायत सांगूं येना. राजकारण, उदरगतीकरण हे विशय सद्याक गोंयांत चर्चेचे जाल्यात. 60 वर्सां पुराय जाल्ल्या गोंयांत आयज लेगीत हत्या, बलात्कार, भ्रश्टाचार सारक्यो गजाली पेंगाट मारून आसात. अशें न्हय, गोंयांत सगळेंच वायट जाता. पूण, जें बरें जाता ताका तोखेवचे परस जें सादारण वा वायट जाता ताका सुदारून आनीक बरें करपांत शाणेपण आसा. हालींच गोंयांत मोपा आंतरराष्ट्रीय विमानतळ, आयुष हॉस्पिटल सारके व्हड प्रकल्प जाल्यात. निश्चीतपणान गोंयच्या विकासान हे प्रकल्प प्रगल्ब थारतले. पूण हे आंतरराष्ट्रीय किर्तीचे प्रकल्प येतना थळाव्या वा गोंयच्या लोकांक रोजगार वा हेर संबंदान फायदो जाता वा जातलो व्हय हेंय तितलेंच गरजेचें. जेन्ना नवे नवे प्रकल्प येतात, तेन्ना कांय प्रमाणान पर्यावरणाची हानी व हेर तरेचें लुकसाण जावप साहजीक. पूण हातूंत लोकांच्या विकासाचो प्रस्न सुरवातेक उप्रासता. ह्या मुखार लेगीत जायते प्रकल्प गोंयांत येतले. पूण ते खरेंच गोंयाक जाय व्हय, तांचो गोंयाक फायदो आसा व्हय, तातूंतल्यान गोंयकारांक वा थळाव्या लोकांक फायदो आसा व्हय हेंय पळोवप, येवजुवप तितलेंच गरजेचें. कारण गोंयच्या फुडाराच्या दृश्टीकोनांतल्या ह्यो गजाली म्हत्वाच्यो आसात. हें जालें ना, जाल्यार मुखार वचून गोंया मुखार एक व्हड प्रस्न उबो रावतलो, ‘फुडें कितें?’
आयज गोंयाक योग्य दिकेन वचपाच्या मार्गदर्शनाची गरज आसा. ल्हानांतल्या ल्हान विशयाक धरून गोंयांत वाद उप्रासपाक चड वेळ लागना. गोंयच्या विकासाच्या मळार चर्चा आनी भासाभाशेचें स्वरूप बदल्लां. आयज आमी गोंयच्या विकासाची, उदरगतीची, राजकारणाची पालखी तरणाट्यांच्या खांदार आसा म्हणटात. पूण अजून कांय खांद ती पालखी सोडपाक तयार ना. जो मेरेन पुराय विश्वासान गोंयच्या तरणाट्यां कडेन पळोवप जावचें ना तो मरेन योग्य निर्णय जावप कठीण आसा.
म्हजे कल्पनेंतलें गोंय हांवें पितारपाक घेतलें, जाल्यार गोंयची सक्षम आशिल्ली तरणी पिळगी ह्या गोंयचो हातभार सांबाळटली. म्हजे कल्पनेंतल्या गोंयांत वळखीन न्हय, जाल्यार कर्तुत्वाचेर आनी मेहनतीचेर भुरग्यांक रोजगार मेळटलो. गोंयकाराक प्राधान्य दिवपा पासत म्हजें गोंय वावुरतलें. जागृत तरणाटे ह्या नात्यान आमी गोंयचे दरेके गजालीचेर लक्ष दवरप गरजेचें आसा. पूण हें करता आसतना जाणकारांचें मार्गदर्शन लेगीत तितलेंच म्हत्वाचें. आमचें मन आनी विचार नितळ आसले जाल्यार केल्ली गजाल सदांच सार्थ थारता. आयज जशें गोंयांत ड्रग्स आनी हेर वेसनांचें फेस्त चल्लां, ताका म्हजे कल्पनेंतल्या गोंयांत कसलीच सुवात ना.
गोंयच्या तरणाट्यांनी येवपी वर्सांची येवजण आंखपाक जाय. फुडाराच्या दृश्टीकोनांतल्यान फावो जावपी संदी सोदून वावर करपाक जाय. गोंयचें दरेक मळ उदरगतीच्या पांवड्यार रसरसपाक आयच्या तरणाट्याची भुमिका म्हत्वाची आसा. गोंयच्या ह्या 61व्या मुक्तीदिसा सावन आमचें ध्येय आनी ध्यास हेच गजालीचेर दवरून मुखार या आनी स्वतंत्र आनी सक्षम गोंयचें सोबीत चित्र आमच्या कार्यांतल्यान रंगोवया.
गौरांग भांडीये
8552883808
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
