भांगरभूंय | प्रतिनिधी
पणजी : विरोधी पक्ष फुडारी युरी आलेमाव हांणी पर्यटन खात्यान दर्यादेगेर सुरक्षितताये खातीर नेमिल्ले दृष्टी कंपनीचेर केल्ल्या खर्चा वेल्यान, तशेंच पर्यटनाक उर्बा दिवपी कंत्राट दिल्ल्या शॉन इव्हेंट कंपनी वेल्यान आमदार विजय सरदेसाय हांणी बुधवारा पर्यटनमंत्री रोहन खंवटे हांकां धारेर धरले. आमदार सरदेसाय हांणी सरळ शॉन इव्हेंट कंपनी कडल्यान मंत्री खंवटे ६० टक्के कमिशन घेता असो गंभीर आरोप केलो.
दृष्टी कंपनीक दिल्ले निधीचो प्रस्न मंगळारा प्रस्न- जापेच्या काळांत युरी आलेमाव हांणी उक्तायलो. पर्यटन खात्यान फाटलीं पांच वर्सां दृष्टी कंपनीचेर २२६.८३ कोटींचो खर्च केला. तरी फाटलीं दोन वर्सां ५६ जाणांक दर्यांत बुडून मरण आयलें. दृष्टीचो काळ जून २०२४ त सोंपूनय पर्यटन खातें नवी निविदा जारी करिना. हातुंतल्यान दृष्टीकूच परत मुदतवाड दिवपाचीं चिन्नां दिसतात अशी टिका आलेमाव हांणी केली. पर्यटन खात्यान दृष्टी वरवीं भ्रश्टाचार चलयला. ह्या प्रकरणाची निवृत्त न्यायमुर्तीं वरवीं चवकशी करची, अशी मागणीय तांणी केली.
आलेमाव हांणी मंत्री खंवटे हांचेर टिका केले उपरांत आमदार विजय सरदेसाय हांणी शॉन इव्हेंट कंपनीचो विशय मुखार हाडलो. पर्यटन खात्यान फाटलीं चार वर्सां राष्ट्रीय आनी आंतरराष्ट्रीय पांवड्यार रोड शो खातीर ६३ कोटींचो खर्च केला. स्पेनांतूय कोट्यांनी रुपया खर्चून खात्यान रोड शो केले. मात, स्पेनांतल्या मेजक्याच पर्यटकांनी गोंयांक भेट दिली. पर्यटनाक उर्बा दिवपाचें काम आदींय विन्सन ग्राफिक्स एजन्सी करताली. मात, पर्यटन खात्यान ते सुवातेर आतां शॉन इव्हेंट कंपनीची नियुक्ती केल्या. ही कंपनी सध्या सरकाराचो जावंय जाल्या. कंपनीची वर्सुकी उलाढाल ६० कोटी जाल्या. हे कंपनीचेर पर्यटनमंत्री खंवटे हांचो आशिर्वाद आशिल्ल्यान ते कंपनी कडल्यान ६० टक्के कमिशन घेतात. जाल्यार, पर्यटन संचालक पांच टक्के कमिशन घेतिल्ल्याचो आरोप आमदार सरदेसाय हांणी केला.
मंत्री खंवटे हांणी आपल्याचेर लायिल्ले आरोप पुसून उडोवपाचो यत्न करतना सांगलें, दर्यादेगेर सुरक्षितताये खातीर नेमिल्ल्या दृष्टीच्या जीवरक्षकांची ड्युटी सकाळचीं ७ ते सांजेवेळार ७ मेरेन आसा. ह्या काळांत जीवरक्षक दर्यादेगांचेर सेवा दिवन बुडप्यांक वाटायतात. फाटलीं दोन वर्सां दर्यांत बुडून जांकां मरण आयलां ते सांजेवेळार ७ ते सकाळीं ७ ह्या काळांत आयल्यांत. तशेंच पर्यटन वाडपा खातीरूच पर्यटन खातें विवीध देशांनी रोड शो सारकिल्ल्यो कार्यावळी आयोजीत करतात. ताका लागून पर्यटकूय वाडल्यात. मात, कोविड, रशिया-युक्रेन झूज हाका लागून मदल्या काळांत विदेशी पर्यटकांचो आंकडो देंविल्ल्याचो दावो मंत्री खंवटे हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
