भांगरभूंय | प्रतिनिधी
पणजीः दिव्यांगांक अर्थीक मजत दिवपा कडेन भाजपा सरकारान आडनदर केल्या असो आरोप करून विरोधी पक्ष फुडारी युरी आलेमांव हांणी राज्यांतल्या आमदारांचो पगार आनी हेर भत्ते जे गतीन वाडयल्यात तेच गतीन दिव्यांगांची मजत वाडोवची अशी मागणी केल्या.
विधानसभा अधिवेशनांत अपंगत्व आशिल्ल्या व्यक्तींक मजत वाडोवपाचें आस्वासन दिवन लेगीत सरकार आपलें उतर पाळपाक अपेशी थारलां अशें आलेमांव हांणी सांगलें.
‘‘असंवेदनशील भाजपा सरकारान आमदारांचो पगार आनी हेर भत्ते वाडोवपाची तयारी दाखयली आनी ती रोखडीच पूर्ण केली, पूण दिव्यांग व्यक्तींक अर्थीक मजत दिवपाची प्रलंबीत मागणे कडेन आडनदर केल्या. डिसेबिलिटी रायट्स असोसिएशन ऑफ गोवा (डीआरएजी) हांणीय हो विशय मांडला, पूण सरकारान तांचे मागणे कडेन लक्ष दिलें ना. सरकाराची ही कृती मान्य ना,’’ अशें आलेमांव हांणी सांगलें.
दिव्यांग सामाजीक सुरक्षा (डीएसएस) येवजणे खाला म्हयनाळी मजत 2 हजारां वयल्यान 6 हजार रुपया करपाची घोशणा सरकारान केल्ली. पूण आस्वासनां पुराय करपाक ते अपेशी थारल्यात. तशेंच 80 टक्क्यां परस चड अपंगत्व आशिल्ल्या मनशाक 8 हजार रुपया दिवपाचें आस्वासन दिल्लें. पूण हें सरकार तांकां मजत करपाची तसदी घेना. हाका लागून राज्यांतलें प्रशासन कोसळ्ळां आनी भाजपान फक्त कमिशन दिवपी कार्यावळींचेर आनी ईडीएमचेर लक्ष केंद्रीत केलां असो आरोप आलेमांव हांणी केलो.
दिव्यांगांक मजत करपाक अपेशी थारिल्लें हें सरकार स्वताक बरें आनी सुशासन आशिल्लें सरकार कशें म्हणपाक शकता? अपंगत्व आशिल्ल्या लोकांक दुख्खांत धुकलतना उदरगतीचो अभिमान बाळगुपाचोय तांकां अधिकार ना, अशें आलेमांव हांणी सांगलें.
भाजपा सरकार अशा विशयां कडेन आडनदर करून लोकांक फायदो जावंक नाशिल्ल्या गजालींचो अभिमान बाळगुपाचेर चड भर दिता ही लजेची गजाल अशें काँग्रेस फुडाऱ्यान सांगलें.
तरणाट्यांक बेकारी भत्तो आनी दिव्यांगांक भत्तो दिवपाक भाजपा सरकार अपेशी थारलां अशें तांणी फुडें उलयतना म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
