भांगरभूंय | प्रतिनिधी
दक्षीण आफ्रिकेचे भोंवडे खातीर तिनूय फॉर्मेटा खातीर भारताच्या पंगडाची घोशणा जाली. दरेक फॉर्मेटा खातीर पंगडाचो वेगळोवेगळो मुखेली आसतलो. टी-20 पंगडाचें फुडारपण सुर्यकुमार यादव करतलो. वन डे क्रिकेटींत मुखेलपदाची जापसालदारकी लोकेश राहुल सांबाळटलो, जाल्यार टॅस्ट प्रकारांत रोहित शर्मा मुखेलपद सांबाळटलो.
रोहित शर्माक टी-20 पंगडाचें लेगीत मुखेलपद दिवपाक शकता अशी कांय दिसां पयलीं चर्चा चालू आशिल्ली. ताका काल पुर्णविराम लागलो. रोहित शर्मान टी-20 आनी वन डे प्रकारांतल्यान आपल्याक पयस दवरला. ताच्या वांगडा विराट कोहली लेगीत टी-20 आनी वन डे मॅचींनी खेळचो ना.
10 डिसेंबरा सावन सुरू जावपी हे भोंवडेर भारत तीन टी-20, तीन वन डे आनी दोन टॅस्ट मॅची खेळटलो. भारत 6 डिसेंबराक दक्षीण आफ्रिकेक वचपाक भायर सरतलो.
पुजारा-रहाणेक टॅस्ट पंगडांत सुवात ना
टॅस्ट तज्ञ बॅट्समन चेतेश्वर पुजारा आनी अजिंक्य रहाणे हांकां टॅस्ट पंगडांत सुवात मेळूंक ना. पुजारान आफ्रिकेंत 10 टॅस्टींनी 535 धांवड्यो केल्यात. जाल्यार रहाणेन 6 टॅस्टींनी खेळटना 402 धांवड्यो केल्यात.
साई सुदर्शन, रिंकू पयले खेपे वन डे पंगडांत
युवा साई सुदर्शन आनी रिंकू सिंह हांकां पयले खेपे वन डे पंगडांत सुवात फावो जाल्या. रिंकू सिंह हाणें टी-20 क्रिकेटींत पदार्पण केलां. सुदर्शनाक अजून आंतरराष्ट्रीय क्रिकेटींत पदार्पण करपाचें आसा.
सुर्यकुमार यादवाक वन डे पंगडांतल्यान भायर
संवसारीक वन डे क्रिकेट सर्तींत पंगडाचो वांगडी आशिल्ल्या सुर्यकुमार यादवाक वन डे पंगडांतल्यान भायर दवरला. सध्या चो ऑस्ट्रेलिये आड चालू आशिल्ले टी-20 माळेंत भारताचें फुडारपण करता.
सॅमसनाचें वन डेंत पुनरागमन, टी-20 पंगडांत सुवात ना
विकेटीकीपर बॅट्समन संजू सॅमसनाचें वन डे क्रिकेटींत पुनरागमन जालां. पूण, टी-20 आनी टॅस्ट पंगडांत ताका सुवात मेळूंक ना.
ऋतुराज, श्रेयस, मुकेश तिनूय पंगडांत सुवात मेळोवपाक येसस्वी
ऋतुराज गायकवाड, श्रेयस अय्यर आनी फास्ट बॉलर मुकेश कुमार हांणी तिनूय पंगडांनी सुवात मेळोवपाक येस मेळयलें.
टी-20 पंगडः सूर्यकुमार यादव (मुखेली), यशस्वी जयस्वाल, शुभमन गिल, ऋतुराज गायकवाड, तिलक वर्मा, रिंकू सिंह, श्रेयस अय्यर, ईशान किशन (विकेटकीपर), जितेश शर्मा (विकेटकीपर), रवींद्र जडेजा (उप मुखेली), वॉशिंग्टन सुंदर, रवि बिश्नोई, कुलदीप यादव, अर्शदीप सिंह, मोहम्मद सिराज, मुकेश कुमार आनी दीपक चाहर.
वन डे पंगडः लोकेश राहुल (मुखेली),ऋतुराज गायकवाड, साई सुदर्शन, तिलक वर्मा, रजत पाटीदार, रिंकू सिंह, श्रेयस अय्यर, संजू सॅमसन (विकेटकीपर), अक्षर पटेल, वॉशिंग्टन सुंदर, कुलदीप यादव, युजवेंद्र चहल, मुकेश कुमार, आवेश खान, अर्शदीप सिंह आनी दीपक चाहर.
टॅस्ट पंगडः रोहित शर्मा (मुखेली), शुभमन गिल, यशस्वी जयस्वाल, विराट कोहली, श्रेयस अय्यर, ऋतुराज गायकवाड, ईशान किशन (विकेटकीपर), लोकेश राहुल (विकेटकीपर), रविचंद्रन अश्विन, रवींद्र जडेजा, शार्दुल ठाकूर, मोहम्मद सिराज, मुकेश कुमार, मोहम्मद शमी, जसप्रीत बुमराह (उप मुखेली) आनी प्रसिद्ध कृष्णा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
