भांगरभूंय | प्रतिनिधी
फोंडें, प्रतिनिधी: आपेव्हाळ- प्रियोळच्या दोगां तरणाट्यांक सरकारी नोकरी दिवपाचें हांयस दाखोवन १४ लाख रुपयांची तोपी घालपाच्या प्रकरणांत म्हाड्डोळ पुलिसांनी पुजा नायक (३९, पोरणें गोंय) हिचे आड गुन्यांव नोंद करून तिका अटक केली. अटक केल्ले दुबावीत बायलेन हेर जायत्या जाणांक सरकारी नोकरी दिवपाचें आस्वासन दिवन तांचे कडल्यान पयशे घेतिल्ल्याची म्हायती पुलीस चवकशे वेळार उक्ताडार आयली. ताका लागून आनीक कागाळी येवपाची शक्यताय वाडल्या.
आपेव्हाळ- प्रियोळाचे गुरूदास गोविंद गावडे हांच्या एका पुताक कनिश्ट अभियंतो, जाल्यार दुसर्या पुताक एलडीसीची नोकरी दिवपा खातीर दुबावीत बायलेन वट्ट १४ लाख रुपया घेतिल्ले. फाटल्या कांय वर्सां सावन त्या दोगांय तरणाट्यांक सरकारी नोकरी दिवपाचें आस्वासन दुबावीत बायल दिताली. मात आजूनय सरकारी नोकरी दिवंक नाशिल्ल्यान शेनवारा रातीं गुरूदास गावडे हांणी म्हाड्डोळ पुलीस स्टेशनार वचून तिचे आड कागाळ केली. पुलिसांनी दुबावीत बायले आड गुन्यांव नोंद केलो. आयतारा सकाळीं तिका ताब्यांत घेतली. चवकशी केले उपरांत ते बायलेक अटक केली.
निरीक्षक योगेश सावंत हांच्या मार्गदर्शना खाला तपास केलो. बायलेक फाटल्या कांय वर्सां सावन खुबश्या जाणां कडल्यान पयशे घेवन सरकारी नोकर्यो दिल्यात. तशें तिणें अशेंच आनीक कांय जाणां कडल्यान नोकरी दिवपाचें हांयस दाखोवन पयशे घेतिल्ल्याचें स्पश्ट जालां.
सरकारी नोकरी ही सुखाची. भरपूर सुटयो, बरो पगार, खूब पेन्शन, कामूय कमी. ताका लागून चडशे लोक खंयच्याय मार्गान सरकारी नोकरी मेळोवपाचो यत्न करतात. पयशे दिवन कोणूच सरकारी नोकरी दिना अशें फाटीं कांय फुडाऱ्यांनी जाहीर केल्लें. तरीय लोक पयशे दिवन ती मेळोवपाचो यत्न करतात, अशें हांगाच्या एका ज्येश्ठ नागरिकान सांगलें.
फाटींय आनीक एके बायलेक ह्याच कारणां वयल्यान पुलिसांनी ताब्यांत घेतिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
