भांगरभूंय | प्रतिनिधी
पणजीः राज्यांत आम आदमी पार्टीची संघटना घटमूट करपा खातीर पक्षान पांच नवे विभाग मुखेली नेमल्यात. ते प्रमाण बायलां विभागाच्या अध्यक्ष पदाचेर ममता मेबान हांची निवड केल्या. जाल्यार ओबीसी विभाग मुखेली म्हूण संदीप पेडणेकार, एसटी विभाग मुखेली राजेश गांवकार, अल्पसंख्यांक विभाग मुखेली जेम्स फर्नांडीस आनी युवा विभाग मुखेली म्हणून पुजन मालवणकार हांची नेमणूक केल्या. पक्षाचे प्रदेशाध्यक्ष वाल्मीकी नायक हांणी बुधवारा पणजेंत जाल्ले पत्रकार परिशदेंत ही म्हायती दिली.
नायक हांणी सांगलें, फाटल्या कांय म्हयन्यां सावन पक्षाची संघटना घटमूट करपा खातीर वावर चालू आसा. ते प्रमाण कांय बदल करपाचे आशिल्ले. पूण महानगरपालिका आनी फोंडें पोटवेंचणुकेक लागून हे प्रक्रियेक कळाव जालो. नव्यान नेमिल्ल्या अध्यक्षांचेर जिल्हो, मतदारसंघ आनी बूथ पांवड्यार पक्षाचो विस्तार करपाची जापसालदारकी सोंपयल्या. ह्यान फुडें पक्षाचें काम चड उर्बेन करतले. एसटी आनी ओबीसी समाज एकठांय आयल्यार भाजपाक व्हड राजकी धपको बसतलो. हाका लागून भाजपा दोनूय समाजांत फूट घालपाचो यत्न करता असो आरोप नायक हांणी केलो.
राज्यांत ओबीसी आनी एसटी समाजाचे मतदान म्हत्वाचें आसा. पूण भाजपाक ह्या समाजाची याद फकत वेंचणुकेच्या वेळार जाता. समाजांत एकवट जालो तर ताचे लुकसाण जातले देखून हे समाज एकठांय येवचे न्हय म्हूण भाजपा सतत कट करता. भाजपांतल्या एसटी फुडारी फाटल्या साडे चार वर्सां सावन फकत एकामेकां कडेन झगडटात आनी आतां वेंचणूक लागीं पाविल्ल्यान आमी एकवटीत आसात अशें ते दाखयतात. गोंयकारांक भाजपाचें हें राजकारण बरेंच समजलां आनी येवपी विधानसभा वेंचणुकेंत भाजपाक हारोवपाचें जनतेन थारायलां.
राजेश गांवकार (एसटी विभाग मुखेली): राज्यांत आदिवासी समाजाची लोकसंख्या सुमार 22 ते 23 टक्के आसा. 2003 वर्सा ह्या समाजाक एसटी दर्जो मेळ्ळो तरी तांच्यो मुखेल मागण्यो अजूनय प्रलंबीत आसात. फाटलीं कितलींशींच वर्सां सरकार मुद्दाम ह्या मागण्यां कडेन आडनदर करता. राज्यांतल्या एसटी समाजाच्या न्याय हक्का खातीर आमी झगडटले.
‘कॉकरोच जनता पार्टी’क तरणाट्यांचो तेंको: पुजन मालवणकार
भाजपा सरकाराच्या काळांत तरणाट्यांच्यो मुळाव्यो गरजो भागनात. देशांत आनी राज्यांत बेरोजगारी व्हड प्रमाणांत वाडल्या आनी शिक्षणीक मळारय व्हड घोटाळे चालू आसात. तरणाट्यांचे प्रस्न सोडोवपाक सरकाराक पुरायपणान अपेस आयिल्ल्यानच आयचे तरणाटे पिळगे कडल्यान (जेन झी) ‘कॉकरोच जनता पक्षाक’ व्हड प्रमाणांत तेंको मेळपाक लागला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
