भांगरभूंय | प्रतिनिधी
पणजी : मान्सून काळांत आपत्ती वेवस्थापना खातीर सरकाराची पुर्व तयारी पुराय जाल्या. आपत्ती वेवस्थापना खातीर मान्सुना आदल्या कामां सयत, अतिरिक्त ऍम्बुलन्स, तालुका पांवड्यार २४ वरां उपलब्ध आशिल्ली कंट्रोल रूम, एनडीआरएफचो स्वतंत्र कुडको,
तटरक्षक दळाच्यो बोटी, पंचायत, नगरपालिका, जिल्लोधिकारी कार्यालयांक विशेश निधी उपलब्ध करून दिवन अश्यो विवीध उपाय येवजण्यो केल्ल्याची म्हायती मुख्यमंत्री डॉ. प्रमोद सावंत हांणी दिली. सोमारा आपत्ती वेवस्थापन प्राधिकरणाचे बसके उपरांत ते माध्यमां कडेन उलयताले.
आपत्ती वेवस्थापना खातीर उपजिल्लोधिकार्यांक ५ लाख रुपया, पंचायतींक ३५ हजार रुपया, नगरपालिकांक ६० ते ७० हजार रुपया, पणजी महापालिकेक १.२० लाख रुपया निधी दिला. तशेंच उत्तर गोंय जिल्लोधिकारी कार्यालयाक ४ कोटी, दक्षीण गोंयांक ३ कोटी जाल्यार कुशावती जिल्ह्या खातीर २ कोटी रुपया निधी दिला. गरज पडल्यार जिल्लोधिकारी कार्यालयांकडेन अतिरीक्त निधीं खातीर मागणी करपाक मेळटली. अपघातांची शक्यता गृहीत धरून राष्ट्रीय महामार्गार ४ अत्याधुनीक ऍम्बुुलन्सी दवरल्यात, अशें तांणी मुखार म्हणलें.
मान्सून काळांत सरकार भारतीय नौदलाच्या १० पाणबुड्यांची मजत घेतलें. ह्या पाणबुड्यांचो ५० लाख रुपयांचो विमो केला. अशीर रस्त्यां खातीर ९६ लाख रुपया खर्चून ल्हान उजो पालोवपी बंब विकत घेतला. सरकारान १७२ जाणांक आपत्कालीन वेवस्थापनाचें प्रशिक्षण दिलां. प्रशिक्षीत आपदा मित्र, सखींक प्रती दीस ७५० रुपया भत्तो दिवपाचो निणरळ घेतला. तालुको पांवड्यार चोवीस वरां उपलब्ध आशिल्ली कंट्रोल रूम सुरू केल्या. हे खातीर जापसालदार अधिकार्यांचे मोबायल नंबर बेगीनूच जाहीर करतले, अशेंय तांणी सांगलें.
एनडीआरएफचो कुडको चार म्हयने गोंयांत
मान्सूनच्या चार म्हयन्यांच्या काळा खातीर एनडीआरएफचो एक कुडको गोंयांत तैनात करतले. तटरक्षक दळा वतीन सागर कवच खाला गोंयचे दर्यादेगेर दोन बोटी तैनात केल्यात.उजो पालोवपी दळ आनी हेर आपत्कालीन सेवा दिवपाचो काळ ६ मिनटां मेेरेन उणो करपाचें आमचें ध्येय आसा, अणें मुख्यमंत्र्यान म्हणलें.
कामगारांची रगताची तपासणी करप गरजेचें
मुख्यमंत्र्यान म्हणलें, मान्सून काळांत डेंग्यू मलेरिया सारकिल्ले रोग पातळपाची शक्यताय आसता. हाका लागून भायल्यान येवपी कामगारांची रगताची तपासणी करप गरजेचें केलां. आपल्यो कुडी भाड्याक दिवपी घर धनयांनीय भायल्यान येवपी कामगारांची तपासणी करून घेवची.
प्राधिकरणाची पुनर्रचणूक
राज्य आपत्ती वेवस्थापन प्राधिकरणाची बेगीनूच पुनर्रचणूक करतले. ते प्रमाण प्राधिकरण मान्सूनच्या चार म्हयन्यां शिवाय हेर म्हयन्यांतूय फकत आपत्ती वेवस्थापनाचें काम करतले. हे खातीर महसूल, उजो पालोवपी दळ, पुलीस खात्यांतल्या कर्मचार्यांची मजत घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
