भांगरभूंय | प्रतिनिधी
डॉ. चंद्रकांत शेट्येः दिवचले मॉन्सूनपूर्व कामां अजून अर्दवट, अधिकाऱ्यांक धरले धारेर
भांगरभूंय । प्रतिनिधी
दिवचलः पावस तेंकलो, तरीय अजून लेगीत दिवचल वाठारांतलीं मॉन्सूनपूर्व कामां पुराय जावंक नात. एका खात्याचे अधिकारी दुसऱ्या खात्याक बोट दाखयत आपली जापसालदारकी फाफुडटात. दिवचलचे आमदार डॉ. चंद्रकांत शेट्ये हांणी मॉन्सूनपूर्व कामांचो नियाळ घेवचे खातीर आपयिल्ले बसकेंत हें चित्र दिसलें. हे बसकेंत आमदारान अधिकाऱ्यांक धारेर धरले. पावसाळ्यांत लोकांक कसलोच त्रास जावचो न्हय हाची सगळे तरेची खबरदारी घेवची. आपत्कालीन यंत्रणा सज्ज दवरची, अशी सुचोवणी करपी आदेश आमदारान अधिकाऱ्यांक दिलो.
झांट्ये जिमखाना सभाघरांत आयोजीत केल्ले बसकेक उपजिल्होधिकारी रोहन कासकार, मामलेदार राजाराम परब, मुख्याधिकारी सचीन देसाय, नगराध्यक्ष कुंदन फळारी, गट विकास अधिकारी श्रीकांत पेडणेंकार, तशेंच सगल्या सरकारी खात्यांचे अधिकारी, नगरसेवक, सरपंच, पंच हाजीर आशिल्ले.
घातक खांदे मारप, गटारांची नितळसाण, व्हाळांची नितळसाण, कोयर वेवस्थापन, वीज वेवस्था, घातक विजेचे खांबे, वीज सरयो, खण पिठांतलो धोको, हुंवार नियंत्रणा संबंदांत विशेश लक्ष, आपत्कालीन यंत्रणा सतर्क दवरप, उजो पालोवपी दळाक सतर्क दवरप अशे साबार विशय बसकेंत चर्चेंत आयले.
सरकारी विवीध खात्यां मदीं कसलोच ताळमेळ नाशिल्ल्याचें बसकेंत दिसून आयलें. एका अधिकाऱ्यान जाल्यार आपल्याक कांयच खबर ना, अशें सांगलें. हाचेर आमदार डॉ. शेट्ये हांणी ताका धारेर धरलो. आणी लोकांचे सेवक, हांगा उपचारिकता करूं नाकात. सरकारी अधिकाऱ्यांनी लोकांचे सेवक म्हूण चड काम करचें आनी लोकांक थाकाय दिवची. आपूण कोणाच्याच आड ना, मात लोकांक कसलोच त्रास जावचो ना, लुकसाण जावचें ना हाची खबरदारी घेवप ही सगल्या खात्यांतल्या अधिकारी, कर्मचारी वर्गाची लागणूक आसा, अशें डॉ. शेट्ये हांणी सांगलें.
शिंपणावळ खात्या वतीन खूब कडेन व्हाळांतलो चिखल काडला. पावसाळ्यांत साळ गांवा कडेन विशेश लक्ष दवरप, तिळारी धरणाचें उदक सोडटना जतनाय घेवप ह्या मुद्द्यांचेरूय बसकेंत चर्चा जाली.
सध्या दिवचल आनी हेर वाठारांत भुंयगत वीज केबल घालपाचें काम चालू आसा. अजून लेगीत हें काम सोंपूंक ना. ताका लागून खणिल्ल्या रस्त्यांक लागून पावसाळ्यांत अपघात जावं येतात. ताका लागून हें काम ताकतिकेन पुराय करचें तशेंच आडावल्लीं हेर कामांय ताकतिकेन पुराय करची. फुडल्या बुधवारा ह्या कामांचो नियाळ घेवपाचें हे बसकेंत निश्चीत केलें.
चडशा पंचायतीं कडेन निधी ना. ताका लागून घातक खांदे मारप शक्य जायना. आपत्कालीन यंत्रणेन ही सगली जापसालदारकी घेवन घातक झाडां आनी झाडांचे खांदे मारचे, अशी मागणी साबार सरपंचांनी हे बसकेंत केली.
निधी मेळोवन दिवपाक कांय वरिश्ठ अधिकाऱ्यांनी असमर्थता दाखयल्या. ताका लागून राज्य सरकारान आपत्कालीन यंत्रणे खातीर गरजेचो निधी उपलब्ध करून दिवचो, अशी मागणी आमदार डॉ. शेट्ये हांणी केली.
कुंदन फळारी, गुरुदास परब, सतीश गांवकार, गुंजन कोरगांवकार, सुदन गोवेकार, अनिकेत चणेकार, दीपा शिरगांवकार, विजयकुमार नाटेकार, रंजना वायंगणकार, सुखदा तेली, धनराज माळगांवकार, विशाल परब, पद्माकर मळीक, गजानन पालकार तशेंच हेरांनीय बसकेंत समस्या मांडल्यो. बसकेंत सगल्या अधिकारी वर्गाक आठ दिसां भितर सगळीं नियोजीत कामां पुराय करून अहवाल सादर करपाचो आदेश दिलो. फुडल्या सप्तकांत वरिश्ठ अधिकाऱ्यां वांगडा नियाळ बसका घेतले.
अधिकारी फोनूच उखलिनात
दिवचल म्हाल आपत्कालीन नियंत्रण विभाग सुरू केला. तांची वळेरी आनी फोन मंबर सगळ्या पंचायतींक तशेंच पालिकेक दिवचे. जे अधिकारी सेवेंत कामाचेर आसतले तांणी ताकतिकेन फोन घेवचे, अशी सुचोवणी बसकेंत केली. खूब खेपे खूबशे अधिकारी आनी जापसालदार व्यक्ती सांजेच्या 5.30 वरां उपरांत फोनूच घेनात. ताका लागून एकादी घडणूक घडली जाल्यार कोणाक सांगपाचें, असोय प्रस्न ह्या वेळार उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
