भांगरभूंय | प्रतिनिधी
पणजी, बातमीदार : बांदोडेंच्या पंचायत चलो अभियान कार्यावळींत आपणें कोणाकूच कसलोच अपशब्द वापरूंक ना. रिव्हॉल्यूशनरी गोवन्साच्या (आरजी) कार्यकर्त्यांनी म्हज्या नांवाची वाट लावपा खातीरूच कार्यावळींत बोवाळ केलो. लोकसभा वेंचणूक लागीं पाविल्ल्यान ते थर्त भियेल्यात. आरजीचे कार्यकर्ते म्हणल्यार समाजाक लागिल्लो एक कलंक, अशी खर टिका वीजमंत्री सुदिन ढवळीकार हांणी आयतारा केली.
शेनवारा मडकय मतदारसंघांतल्या बांदोडा पंचायतींत राज्य सरकाराच्या ‘पंचायत चलो’ अभियाना खाला आयोजीत कार्यावळींत मंत्री सुदीन ढवळीकार आनी आरजीचे सरचिटणीस विश्वेश नायक हांचे मदीं जाल्लो वाद आनी मंत्री ढवळीकार नायक हांकां ‘गळ्याक धरतलों’ अशें म्हणटनाचो व्हिडिओ सोशल मिडियाचेर व्हायरल जाला. मात आपणें नायक हांकां तशें म्हणुंकूच ना. ‘तूं हांगा कित्याक आयला?’ं इतलेंच हांवें ताका विचारिल्लें. लोककल्याणकारी प्रकल्पांक विरोध करप, अशे प्रकल्प जावपाक दिवचे न्हय होच आरजी पक्षाचो अजेंडा. शेनवारा बांदोड्यां ह्या पक्षाच्या फुडार्यांनी घाल्लो बोवाळ आदींच नियोजीत केल्लो, असो दावो मंत्री ढवळीकार हांणी केलो.
पंचायत चलो अभियान कार्यावळी खाला मडकय मतदारसंघाची जबाबदारी मंत्री विश्वजीत राणे हांकां दिल्या. हे कार्यावळींत आरजीचे कार्यकर्ते बोवाळ करतले अशी म्हायती आपल्याक मंत्री राणे हांणी पयलींच दिल्ली. थळाव्यांनी आपले प्रस्न गटविकास अधिकार्यां वरवीं (बीडीओ) मंत्र्यांक विचारचें अशें पयलींच थारिल्लें. तरीय आरजीच्या कार्यकर्त्यांक मुद्दम बोवाळ घालपाचो आशिल्लो. ताका लागूनच तांणी आपले प्रस्न बीडीओ वरवीं विचारूंक ना. तांकां फकत म्हज्या नांवाची वाट लावपाक जाय आसली, अशें मंत्री ढवळीकार हांणी नमूद केलें.
मजगतीं, आरजी पक्षाच्या कार्यकर्त्यांक भोवजन समाजाचें लुकसाण करपाचें आसा. ताका लागून गोंयच्या बर्या खातीर उबारपी प्रकल्पांक ते मुद्दम जावन विरोध करतात. हे विशीं मुख्यमंत्री डॉ. प्रमोद सावंत हांचे कडेन कागाळ करतलों. मुख्यमंत्र्यांनी आतांच तांचे विशीं योग्य ती भुमिका घेवंक ना जाल्यार कांय दिसांनी परिस्थिती हाता भायर वचपाची शक्यताय आसा, अशेंय मंत्री सुदिन ढवळीकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
