भांगरभूंय | प्रतिनिधी
फोंडें : सरकार तुमच्या दारार, हे येवजणे खाला सरकारान लोकांच्यो समस्या सोडोवपाचो यत्न केला. ताचो जायत्या जाणांक लाव मेळ्ळा. मात धारबांदोडेंच्या सरकारी इमारतींत बुधवारा दनपरां एक आगळो- वेगळो प्रकार पळोवपाचो वेळ सरकारी अधिकार्यांचेर आयलो. ‘सरकार तुमच्या दारार आनी ९० वर्सां पिरायेचे जाण्टेची वारी नागरी पुरवण खात्या भायर‘ अशें म्हणपाचो वेळ लोकांचेर आयलो.
जाण्टेपणार ती कार्यालया भायर रावपाकूच आयिल्ली. मात उपजिल्लोधिकारी निलेश धायगोडकार हांणी तिची व्यथा जाणून घेवन समस्या सोडयिल्ल्यान वांगडा हाडिल्ली शेंदरी, पांघरुण, तांदूळ आनी आयदनां घेवन ती पुता सयत घरा गेली.
हे विशींची सविस्तर म्हायती अशी, धारबांदोड्यां नागरी पुरवण सहाय्यक संचालकान एके ९० वर्सां पिरायेचे जाण्टे बायलेक रेशन कार्ड सरेण्डर करपाची नोटीस धाडिल्ली. तिचो एक पूत आनी सून सरकारी कर्मचारी. तांचें वर्सुकी उत्पन्न ५ लाख रुपयां परस चड आशिल्ल्याचें कारण नोटिसींत दिल्लें. मात खरें म्हणल्यार तिचो हो पूत आनी सून दुसरे कडेन रावतात. ते बायलेची सेवा धाकलो पुत करता. सरकारी कर्मचारी आशिल्ल्या पुतान कांय वर्सां आदीं रेशन कार्डांतल्यान आपलें नांव काडचें न्हय म्हणून नागरी पुरवण खात्याक पत्र दिल्लें. मात त्याच सरकारी कर्मचारी आशिल्ल्या पुतान रेशन कार्डा विशीं कागाळ केल्ल्यान अधिकार्यांक कारवाये खातीर पत्रवेव्हार करचो पडलो.
खात्यान ३ ऑक्टोबराक ते जाण्टे बायलेक रेशन कार्ड सरेंडर करपा विशीं नोटीस धाडिल्ली. ती घरांत लेगीत भोंवपाक शकनाशिल्ल्यान तिच्या पुतान धाडिल्ले नोटीसीक जाप दिवंक ना. मात २६ नोव्हेंबराक नागरी पुरवण खात्यान परत नोटीस काडून ४ डिसेंबराक दनपरां ३ वरांचेर रेशन कार्ड घेवन हजर रावपाचो आदेश दिलो. गैरहजर रावल्यार रेशन कार्ड रद्द करपाचें नोटिशींत म्हणिल्लें. ताका लागून धाकलो पूत जाण्टे आवयक घेवन बुधवारा दनपरां ३ वरांचेर इमारतीच्या मुखेल दारा मुखार रावलो. आवयक चलपाक जायना म्हणून तांणी थंयच तिका शेंदरी घालून बसयली. पांघरुण, तांदूळ आनी आयदनांय थंयच हाडून दवरिल्ल्यान सरकारी अधिकारी तांकां पळयतूच उरले. हे विशीं म्हालाचे उपजिल्हाधिकारी निलेश धायगोडकार हांकां म्हायती मेळ्ळे उपरांत तांणी रोखडोच ते जाण्टेलेच्या धाकट्या पुताक आपोवन घेतलो. रेशन कार्डा विशीं कागाळ केल्ले जाण्टे बायलेच्या सरकारी कर्मचारी आशिल्ल्या पुताक आनी नागरी पुरवण अधिकार्यांकूय संपर्क करून हाचेर उपाय काडलो. उपरांत अधिकार्यांनी एका म्हयन्यांत जाण्टे बायलेक नवें रेशन कार्ड दिवपाचें आस्वासन उपजिल्हाधिकारी धायगोडकार हांचे मुखार दिलें.
आस्वासन दिले उपरांत धाकटो पूत तिका आनी वांगडा हाडिल्लें सगळें सामान घेवन घरा परतलो. ह्या वेळार तिच्या पुतान, सरकारी अधिकार्यांनी लोकांची पयलीं सत्यस्थिती जाणून घेवची आनी मागीरुच पत्रवेव्हार करचो, असो सल्लो दिलो. हो पुराय प्रकार ते इमारतींत सुमार देड वर चल्लो.
एक बरे अधिकारी म्हणून श्री. धायगोडकार हांची ह्या वाठारांत वळख आसा. इमारतीच्या खंयच्याय खात्यांत कामां घेवन येवपी लोकां कडेन ते बरे भशेन वागून, तांकां स्वता मेळून तांचे प्रस्न सोडयतात, अशें कांय नागरिकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
