भांगरभूंय | प्रतिनिधी
झाडाचे खांदे मारतना दुर्घटणा
सुरक्षा वेवस्थेचेर परतून प्रस्नचिन्न
चवकशी करपाचे आमदाराचे आदेश
भांगरभूंय । प्रतिनिधी
दिवचल/ पणजी : दिवचल म्हालांतल्या अस्नोड्यां शुक्रारा सकाळीं झाडाचे खांदे मारतना विजेचो शॉक लागून वीज खात्यांतल्या लायन हेल्पर मंथन आरोस्कार (रा. मावळींगे दिवचल) हाका मरण आयलें. हे दुर्घटणेंत ताच्या वांगडा काम करपी हेर दोग कर्मचारी खूब भियेल्यात. तांचेर दिवचल भलायकी केंद्रांत उपचार केले. हे घडणुकेक लागून वीज खात्यांत हळहळ उक्तायतात. तेच वांगडा कर्मचाऱ्यांचे सुरक्षेचो प्रस्न परतून साणीर आयला.
मेळिल्ले म्हायती प्रमाण, अस्नोडेंच्या उदक शुद्धीकरण प्रकल्प वाठारांत क्रेनीच्या आदारान झाडांचे खांदे मारपाचें काम चालू आशिल्लें. ह्या वेळार अचकीत वीज सरयांचो स्पर्श जाल्ल्यान मंथन हाका नेटाचो विजेचो शॉक लागलो. ह्या अपघातांत ताका सुवातेचेरूच मरण आयलें.
अपघाता उपरांत 108 अॅम्ब्युलन्सींतल्यान मंथन आरोस्कार हाका हॉस्पिटलांत व्हेलो. मात, वैजकी अधिकाऱ्यांनी ताका मरण आयिल्ल्याचें घोशीत केलें.
घडणुकेची म्हायती मेळटाच मयेंचे आमदार प्रेमेंद्र शेट हांणी घडणुकेचे सुवातेर येवन म्हायती घेतली. तांणी संबंदीत अधिकाऱ्यां कडल्यान घडणुकेची म्हायती घेतली, तशेंच मरण आयिल्ल्या कर्मचाऱ्याच्या कुटुंबीयांची भेट घेवन तांकां भुजवण दिली. ह्या पुराय प्रकरणाची खोलायेन चवकशी करपाचे आदेश दिल्ल्याचें तांणी सांगलें.
मजगतीं, समाजीक कार्यकर्ते अजय प्रभुगांवकार हांणी सांगलें, फाटल्या तीन वर्सांत वीज खात्यांतल्या कर्मचाऱ्यांक मरण येवपाची ही तिसरी घडणूक आसा. ताका लागून वीज खात्याचे सुरक्षा वेवस्थेचेर गंभीर प्रस्न उपस्थीत जातात. तांणी हे घडणुके विशीं खर नाराजी उक्तावन कर्मचाऱ्यांक गरजेचें सुरक्षा साहित्य, संरक्षण उपकरणां आनी आधुनीक साधनां ताकतिकेन उपलब्ध करून दिवचीं, अशी मागणी केली.
फक्त घोशणाबाजी करिनासतना प्रत्यक्ष सुरक्षा उपाय येवजण चालीक लावप गरजेचें आसा. वीज खात्यांत स्वतंत्र सुरक्षा अधिकारी नेमून पुराय कारभाराची चवकशी करची, अशीय मागणी प्रभुगांवकार हांणी केली.
दिवचल पुलिसांनी घडणुकेचो पंचनामो केलो आनी कूड पोस्टमार्टमा खातीर जीएमसींत धाडून दिली. घडणुकेचो अदीक तपास कोलवाळ पुलीस करतात.
लायनमनांनी सुरक्षा उपकरणां वापरची : वीज मंत्री
पणजी : विजेचे खांबे वा लायनीचेर दुरुस्तीचें काम करतना जतनाय घेवपा सयत लायनमनांनी सुरक्षा उपकरणांचो वापर करपाक जाय, अशें वीज मंत्री सुदिन ढवळीकार हांणी मागलां. अस्नोड्यां लायनमनाक शॉक लागून आयिल्ल्या मरणाचेर तांणी दुख्ख उक्तायलें. लायनीचेर काम करतना अपघात जावचो न्हय म्हूण गरजेची जतनाय लायमनांनी घेवपाक जाय. पावर सप्लाय बंद करपा सयत हेल्मेट, ग्लोव्हज तशेंच हेर उपकरणांचो वापर लायमनांनी करपाक जाय. सुरक्षे खातीर जी शिस्त वा आदेशाक पाळो दिवप गरजेचें आसा, त्यो गजाली लायनमनांनी करपाक जाय, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
