भांगरभूंय | प्रतिनिधी
फोंडें, प्रतिनिधी ः फाटल्या 25 सप्टेंबराक सांजवेळा 7.30 वरांचेर कुंडयच्यान दोन बायलां आनी एका दादल्याचे अपहरण जाल्लेx. उपरांत म्हाड्डोळ पुलिसांनी चवकशी करून संगमेश्वर (रत्नागिरी) पुलिसांचे मजतीन 7 अपहरण करप्यांक धरून गोंयांत हाडून रितसर अटक केली.
मेळिल्ले म्हायती प्रमाण, मनोज कुमार यादव आनी महिपाल मेहरचंद (दोगूय हरियाणा) हांणी आदले बायलेचें अपहरण करपाचो कट रचलो. ते प्रमाण सोनम, मंजू आनी मंजूचो घोव महेंद्र यादव हांचें 25 सप्टेंबराक सांजवेळा 7:30 वरां मजगतीं कुंडयच्या तांच्या घरांतल्यान अपहरण केलें. ह्या प्रकरणात सोनमाचो सध्याचो घोव सोनू लथार हाणें म्हाड्डोळ पुलिशेंत कागाळ केली. पुलिसांनी भारतीय दंड संहितेच्या कलम 115, 140 (3) (4) आनी 3 (5) खाला गुन्यांव नोंद केलो. कागाळीचेर आदारुन पुलिसांनी दोन तपास पंगड स्थापन केलें. फोन ट्रॅकिंग वरवीं अपहरण करप्यांचें लोकेशन संगमेश्वर- रत्नागिरींत ट्रेस केलें. पुलिसांनी ह्या प्रकरणाची सविस्तर म्हायती संगमेश्वर पुलिसांक दिली. म्हायती प्रमाण संगमेश्वर पुलिसांनी अपहरण करप्यांची गाडी आडायली.
मुखेल अपहरण करपी मनोज कुमार यादव, महिपाल मेहरचंद, बीरसिंग सिंह, सत्यपाल लखीराम, दीपक बीर सिंग, श्रीचंद सिंग आनी बजरंग रामचंद्र हांकां ताब्यांत घेवन गोंयांत हाडून रितसर अटक केली. मजगतीं, ह्या प्रकरणांत वापरिल्ली मारुती सुझुकी आनी अर्टिगा गाडीय जप्त केल्या. सोनम यादव, मंजू यादव आनी महेंद्र यादव सुरक्षीत आसात.
ह्या प्रकरणांत दक्षीण गोंय अधीक्षक सुनीता सावंत आनी फोंडें उपअधीक्षक अर्षी आदिल हांच्या फुडारपणा खाला आनी म्हाड्डोळ पुलीस निरिक्षक योगेश सावंत फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
