भांगरभूंय | प्रतिनिधी
पणजीः एका पुलीस कॉन्स्टेबलाक आत्महत्या करपाक प्रवृत्त करपी आनी पयशांच्या बदल्यांत सरकारी नोकरी दिवपाच्या प्रकरणांची सरकारान गंभीरतायेन दखल घेवपाक जाय अशें सांगून, सरकारी नोकरे खातीर पयशे घेवपाच्या प्रकरणाची खोलायेन चवकशी करून तातूंत घुस्पल्ल्या एजंटांचे टोळयेक उक्तडार हाडचे अशी मागणी विरोधी पक्ष फुडारी युरी आलेमांव हांणी केली.
पुलीस कॉन्स्टेबल प्रथमेश गावडे हांच्या आत्महत्या प्रकरणांतल्या दोगां निलंबीत महिला कॉन्स्टेबलांनी कोलवाळ बंदखणीच्या पयल्या माळ्या वयल्यान उडी मारून जखमी जाल्ले घडणुकेचेर प्रतिक्रिया दितना आलेमांव हांणी राज्य वायट परिस्थितींतल्यान वता अशें म्हणलें.
आत्महत्येक प्रवृत्त करप ही गंभीर गजाल आशिल्ल्यान ताका गंभीरतायेन घेवपाची गरज आसा अशें तांणी सांगलें.
सरकारी नोकरे खातीर पयशे घेवपाच्या घोटाळ्याक लागून एका सरकारी कर्मचाऱ्याचेर आत्महत्या करपाची पाळी आयली. ताका हें खर पावल उबारपाक कित्याक पडलें हाची खोलायेन चवकशी जावपाक जाय अशें आलेमांव हांणी सांगलें.
ह्या प्रकरणाचो तपास करतना राज्यांतल्या पुलिसांचेर चेपण येवपाची शक्यताय आशिल्ल्यान हें प्रकरण सीबीआय कडेन दिवचें वा ताची न्यायालयीन चवकशी करची, अशें आलेमांव हांणी सांगलें.
कांय जाण माशेलांतल्या पुलीस आवट पोस्टाचेर कागाळ दाखल करपाक आयिल्ले तेन्ना तांकां मजत करचे परस एक पुलीस अधिकारी दुबाविताचे गाडयेंत बशिल्लो अशी म्हायती आमकां मेळ्ळ्या. हे वरवीं पुलीस दुबावितांक सुरक्षा दितात हें स्पश्ट जालां अशें आलेमांव हांणी सांगलें.
दुबावितांनी लोकांक फटयल्यात आनी कोट्यांनी रुपयांची मालमत्ता जमयल्या, असो हो राज्यांतलो नोकऱ्यांचो व्हड घोटाळो दिसता. एक गजाल समजून घेवपा सारकी आसा ती म्हणल्यार लोकांनी तांकां पयशे दिले कारण तांणी पयलीं सरकारी नोकऱ्यो दिल्ल्यो आसूंक जाय. ताका लागून ह्या पुराय टोळये फाटल्यान कोणाचो हात आसा हाची चवकशी जावपाची गरज आसा, अशें आलेमांव हांणी सांगलें.
लांच दिवन नोकऱ्यो घेतिल्ल्यांचेर कारवाय जातली काय ना हें मुख्यमंत्री प्रमोद सावंत हांणी स्पश्ट करचें. ह्या प्रवृत्तीक लागून राज्यांतल्या पात्र उमेदवारांक सरकारी नोकऱ्यो मेळपा पसून वंचीत दवरतात अशें आलेमांव हांणी सांगलें.
जांणी नोकऱ्यां खातीर पयशे फारीक केल्यात तांकां आपले पयशे परतून मेळपाक जाय. तांचेर अन्याय जावचो न्हय आनी अशा घोटाळ्यांक आळाबंद हाडपा खातीर ह्या प्रकरणाची खोलायेन चवकशी जावपाची गरज आसा. तातूंत वांटेकार आशिल्ले पुराय टोळयेक उक्तडार हाडून तांकां ख्यास्त दिवपाक जाय, अशें आलेमांव हांणी सांगलें.
भ्रश्ट भाजपा सरकार अशा घोटाळ्यांचेर कारवाय करपा खातीर गंभीर ना, असो आरोप काँग्रेस फुडाऱ्यान केलाे.
पणजीचे भाजपाचे आमदार बाबूश मोंसेरात हांणी आपल्या फाटल्या कार्यकाळांत भौशीक बांदकाम खात्याच्या नोकऱ्यांच्या घोटाळ्या वयल्यान आपल्याच सरकाराचेर आरोप केल्ले. पूण पात्र उमेदवारांक न्याय दिवपा खातीर कांयच जावंक ना आनी नोकऱ्यांची विक्री सुरूच आसा, अशें आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
