भांगरभूंय | प्रतिनिधी
दिवचल : आत्मनिर्भर आनी स्वयंपूर्ण गोंयचें आवाहन करपी मुख्यमंत्री डॉ प्रमोद सावंत हांणी अंदूच्या चवथी खातीर प्लास्टर ऑफ पॅरिसाच्यो मुर्ती आनी प्लास्टिक फुलांची सजावट करची न्हय अशें भावनीक आवाहन सगल्या गोंयकारांक केलां. पर्यावरणाचेर आदारीत सजावट करात, मातीचेच गणपती पुजात, मिठाय-फराळ घरांतूच करात, अशें आवाहनूय मुख्यमंत्री सावंत हांणी केलां.
तशेंच सगल्या गोंयच्या गणेश भक्तांनी माटोळी खातीर लागपी वस्तू निसर्गीक वापरच्यो प्लास्टिकच्यो वापरच्यो न्हय. संवसारांतल्या पर्यावरणपूरक फळांचो वापर करचो असो उलोय मुख्यमंत्र्यान मारला.
सरकार वेगवेगळे तरेचे कायदे तयार करून चालीक लायतात. ते खातीर दरेक गोमंतकियान संकल्प केलो जाल्यार कितलेशेच कायदे, अटींची गरजूच पडची ना, स्वयंपूर्ण स्वयंपूर्णतायेचें ध्येय दवरून पर्यावरणपूरक उत्सव मनयतना दरेकल्यान 11 दीस पर्यावरणाच्या आदारान हो उत्सव मनोवचो. फराळ घरांत करप जांकां शक्य ना तांणी स्वयंपूर्ण बाजारांतल्यान हे घरगुती पदार्थ खरेदी करून स्वयंपूर्णतेक चड आदार दिवचो अशें आवाहनूय डॉ. प्रमोद सावंत हांणी केलां.
सगल्या गोंयकारांनी बाजारांत येवपी प्रदुशीत मिठाय, प्लास्टिक आनी हेर गजालीं विशीं खबरदारी घेवची आनी आमच्या म्हान संस्कृतायेचें दायज सांबाळून दवरपी निसर्ग देव गणराया हांचे सेवे खातीर पुरायपणान नमन करून स्वयंपूर्ण चवथ मनोवची अशें आवाहन मुख्यमंत्री डॉ प्रमोद सावंत हांणी एका निवेदनांत केलां.
विसर्जना उपरांत निर्माल्य न्हंयेंत उडोवचें न्हय जाल्यार ताचो योग्य तरेन विलो लावचो अशें आवाहनूय मुख्यमंत्र्यान केलें. नितळ, सोबीत गोंय दवरप हें दरेका गणेश भक्ताचें कर्तव्य आसून दरेकल्यान तें पाळचें, अशें मुख्यमंत्री सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
