भांगरभूंय | प्रतिनिधी
वास्कोच्या नागरिकांची पुलिशेंत कागाळ
पणजी : सध्या गौतम खट्टर प्रकरणाक लागून गोंयांतलें राजकी आनी समाजीक वातावरण तापिल्लें आसतनाच सोशल मिडियाचेर कांय जाणांनी हिंदू देवी-देवतां विशीं कांय आक्षेपार्ह कमेंट्स केल्ल्याचो नवो प्रकरण मुखार आयला. हे संबंदी वास्कोच्या नागरिकांनी पुलीस स्टेशनाचेर वचून कागाळ दाखल केली. फेसबूक, इंस्टाग्राम सारक्या सोशल मिडियाचेर कांय व्यक्तींनी मुद्दाम धर्मीक एकचार खंडीत करपाचो यत्न केला असो आरोप कागाळदारांनी केला.
हे विशीं मेळिल्ले म्हायती प्रमाण, कागाळींत कांय विशीश्ट सोशल मिडिया युजर्सांच्या नांवाचो उल्लेख केला. ह्या व्यक्तींनी हिंदू देवतां विशीं सामके सकयले पातळेर वचून अश्लील कमेंट्स केल्यात आनी धर्मीक कार्यावळींच्या लायव्ह स्ट्रीगींग मजगतींय आक्षेपार्ह गजाली शेअर केल्यात. गौतम खट्टराक अटक केल्या उपरांत निर्माण जाल्ल्या वादांचो गैरफायदो घेवन कांय लोक मुद्दाम प्रक्षोभक पोस्ट करतात अशें नागरिकांनी पुलिसांचे नदरेक हाडून दिलां. अश्या गजालींक लागून धर्मीक भावना दुखवतात. तशेंच गोंयांत शांतताय आनी समाजीक समरसतायेकय धोको निर्माण जाता अशें मत कागाळदारांनी उक्तायलां.
ह्या प्रकरणाचो खोलायेन तपास करून संबंदीत दोशींचेर बेगोबेग खर कायदेशीर कारवाय करची. सायबर गुन्यांवगारीच्या ह्या प्रकरणाक लागून समाजांत वायटपण निर्माण जावचें न्हय म्हूण पुलिसांनी बेगोबेग पावलां उबारपाची गरज आसा, अशी मागणी तांणी केल्या.
मजगतीं पुलीस अधीक्षक गुरुदास कदम हांणी आंदोलकांक शांत केलें. संबंधितांचेर खर कारवाय करतले अशें तांणी सांगलें.
वास्को पुलीस आतां ह्या प्रकरणाची तांत्रीक बाजू तपासून संबंदीत सोशल मिडिया खात्यांचें व्हॅरिफीकेशन करता. रोखडीची फुडली तपासाची प्रक्रिया राबयतले अशी शक्यताय आसा. हे घडणुकेक लागून शारांत ताणाचें वातावरण आसा. नागरिकांनी शांतिकाय राखपाचो उलो सध्या मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
