आतां सोशल मीडिया इन्फ्ल्युएन्सर्स करतले सरकाराच्या धोरणांचो प्रसार
भांगरभूंय | प्रतिनिधी
पणजी, प्रतिनिधी : गोंय सरकारान सोशल मिडिया फ्रेंझी तरणाट्यांक कॅश इन करपा खातीर २४ जानेवारी दिसा म्हायती आनी प्रसिद्धी विभागाचे मजतीन एक म्हत्वाचें पावल उबारलां. ते प्रमाण सरकारी येवजण, धोरणां आनी कार्यावळीं विशीं लोकां मेरेन पावपा खातीर आनी जागृताय वाडोवपा खातीर गोंय मनरिजवण सोसायटी वरवीं सोशल मिडिया इन्फ्लूएन्सर्सची निवड केल्या.
तरणाटे पिळगेक आकर्शीत करपा खातीर सोशल मिडियाचो प्रभावीपणान वापर करपाचें उद्दीश्ठ सरकारान दवरलां. हे कार्यावळी खाला गोंयांतल्या नामनेच्या ३० सोशल मिडिया इन्फ्लूएन्सर्सची निवड केल्या.
ईएसजीचे अध्यक्ष तशेंच मुख्यमंत्री डॉ. प्रमोद सावंत हांणी ह्या उपक्रमाचो मुखेल उद्देश सोशल मिडिया इन्फ्ल्युएन्सर्सा वरवीं सरकाराच्या विंगड विंगड धोरणात्मक कार्यावळींक लोकां मेरेन पावयत चडांत चड जागृताय निर्माण करप आसा, अशें सांगलां. तशेंच पर्यटन, शिक्षण, आध्यात्मीक, वैजकी आनी हेर विंगड विंगड मळा विशीं सोशल मिडियाचेर प्रोमोशन करप आसतलें. निवड प्रक्रिये विशीं तांणी सांगलें, निवड प्रक्रियेंत आयिल्ल्या सगळ्या अर्जांचें खोलायेन मुल्यमापन केलें. ह्या वेळार वट्ट ४६ अर्जदारां मदल्या ३० सोशल मिडिया इन्फ्ल्युएन्सर्सची निवड केल्या.
निवड केल्ल्या इन्फ्लूएन्सर्सांचीं नांवां
प्राप्ती तार, विराज फडते, सिया शिरवयकार, मंदार गांवस, कुशल पालेकार, रुबेन रॉड्रिग्स, अशरफी गायकवाड, अमित नायक, ऐश्वर्या गांवकार, प्रसाद परब, किम्बर्ले लोबो, आकाश कांबळी, आनंद रायकर, ऐश्वर्या माल्लेकार, राजेंद्र चरीकर, केविन पिंटो, इशरा मुल्ला, सृष्टी प्रभु देसाय, मनोज पांचाळ, मितांशु कवळेंकार, वैष्णवी गांवकार, अक्षय अमृत वळवयकार, वंदिता खांडोळकार, श्रुती सिमेपुरुषकार, सुदेश साळगांवकार, दिपाली चोडणकार, अनिश भाटी, निशिता रिवणकार, पुजा उसपकार आनी हनुमंत नायक.
येवजण्यांचो लाव घेवपा खातीर पात्रताय
० फॉलोअर्स आनी सबस्क्रायबर पळोवन सोशल मीडिया इन्फ्ल्फुएन्सरांचे पंगड करतले. तातूंत खातीर तांकां निधी दितले.
० गोंयांत १५ वर्सां रावपी आनी १८ वर्सां वयल्या सोशल मिडिया इन्फ्ल्युएन्सरांक हे येवजणेंत प्रधान्य.
० सोशल मिडिया इन्फ्ल्युएन्सर्सच्या सकयल्या गटा प्रमाण वर्गीकरण केलें.
कॅटेगरी अ – १०,००,०० वा ताचे परस चड फॉलोअर्स / सब्स आशिल्ले
कॅटेगरी ब – ५०,००० ते ९९,९९९ फॉलोअर्स / सब्स आशिल्ले
कॅटेगरी क – २५००० ते ४९९९९ फॉलोअर्स / सब्स आशिल्ले
कॅटेगरी ड – १०००० ते २४९९९ फॉलोअर्स / सब्स आशिल्ले
फकत पर्सनल प्रोफायल गृहीत धरल्या
० प्रोफाइलीचेर फाटल्या ६ म्हयन्यांत उण्यात उणे ६० पोस्ट आसप गरजेचें.
० एका वर्साचो तांचे कडेन करार करतले. वर्सभर तांचें काम पळोवन फुडलो निर्णय घेतले.
कामाचे पद्धती विशीं म्हायती
० संबंदीत खात्या कडेन तयार पोस्टर दितले. ते पोस्टर वा कंटेंट आपल्या फेसबूक / ट्वीटर / इन्स्टाग्रामाचेर काळांत पोस्ट करचे पडटले.
० हे येवजणेंत वांटेकार जाल्लो इन्फ्ल्युएन्सर, खंयचोय कंटेंट निर्माण करपाक इत्सूक आसल्यार संबंदीत खात्याच्या मार्गदर्शना खाला तयार करपाक शकता. बरोवन रिलीज ऑर्डर मेळ्ळ्या उपरांतूच ती रिलीज करची, नाजाल्यार संबंदीत कामाचे पयशे दिवचे ना.
० हे येवजणें वांटेकार जाल्ले व्यक्तीन आदेशा बगर आपल्या प्रोफायला वयल्यान कंटेंट काडचो न्हय. तशेंच कराराच्या काळांत आक्षेप घेवपी कंटेंट घालचो न्हय.
० हे येवजणेंत वांटेकार जाल्लो प्रशासनान दिल्लें काम न्हयकारपाक शकना. संबंदीत व्यक्ती अशें करपाक सक्षम नाशिल्ल्याचें दिसल्यार तेन्नाच ताचो करार रद्द करतले.
इन्फ्ल्युएन्सर मेळपी पेमेंट
१ ) प्रशासनान/ संबंदीत खात्यान दिल्ले पोस्टर/ ग्राफिक्स पोस्ट करपाक
कॅटेगरी अ – २००० रुपया
कॅटेगरी ब – १५०० रुपया
कॅटेगरी क – १००० रुपया
कॅटेगरी ड – ५०० रुपया
२) प्रशासनान/ संबंदीत खात्यान दिल्ले ऑडिओ विजुअल्स पोस्ट करपाक
कॅटेगरी अ- ४००० रुपया
कॅटेगरी ब -३००० रुपया
कॅटेगरी क – २००० रुपया
कॅटेगरी ड – १५०० रुपया
३) हे येवजणेंत आसपाव जाल्ल्या कंटेंट क्रिएटर्सनी तयार केल्ले आनी प्रशासनान/ संबंदीत खात्यान प्रमाणीत केल्ले व्हीडीओ पोस्ट करपाक
कॅटेगरी अ- ५०,००० रुपया
कॅटेगरी ब -३०,००० रुपया
कॅटेगरी क -२०,००० रुपया
कॅटेगरी ड- १०,००० रुपया
सरकार दरवर्सा लोकां खातीर फायद्याचो आशिल्ल्यो येवजण्यो सादर करता. खुबश्यो येवजण्यो उणे म्हायतीक लागून अंत्योदय तत्वाकडेन पावच ना. ताचे खातीर येवजण्या विशीं म्हायती मेळचे खातीर जायते फावट बालवाडीच्यो शिक्षिका वा गटविकास अधिकार्यांक फुडें काडटात. ताचोय परिणाम सारको जाय तसो नासता. ताका लागून सोशल मिडिया इन्फ्ल्युएन्सर्सा वरवीं हें काम प्रभावी पणान करपाचो निर्णय सरकारान घेतिल्लो दिसता. पर्यटन, कृषी, भलायकी, समाजकल्याण, शिष्यवृत्ती, परीक्षा तशेंच विंगड विंगड समाजोपयोगी धोरण आनी हेर मळावयल्यो कार्यावळी ह्या सोशल मिडिया इन्फ्ल्युएन्सर्सां वरवीं प्रभावीपणान मांडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
