भांगरभूंय | प्रतिनिधी
अन्न आनी वखदां प्रशासन (एफडीए) सद्यां केन्ना न्हय इतलें सक्रीय जालां. धाडी चालूच आसात. घडये मंत्री पांवड्याचेर आदेश मेळ्ळा आसतलो. खरें म्हणल्यार, हे मोहिमक विसव दिवपाक फावना. आयज पोरण्यां गोंयां, फेस्ता वेळार खाशेले पंगड फेरयेंतले सगले मांड तपासतले. भेसळ, नितळसाण हाचे कडेन तांचें लक्ष आसतलें. ह्या पंगडांचो आंकडो वाडोवन उत्तर आनी दक्षीण गोंयांत मेळून उणेच 10 पंगड भोंवतले, अशी तजवीज सरकारान करची. कारण भेसळीचें, बुरशेपणाचें, गैरप्रकाराचे हें प्रकार खूबच वाडल्यात. ताका लागून दुयेंसांय पातळ्ळ्यांत. भलायकी खात्या कडेन नेमके कितले लोक खाणां, जेवणांक लागून दुयेंत पडटात, ताचो आंकडो आसतलोच!
पयरूच एफडीए अधिकाऱ्यांनी फेरयेंतले नितळसाण दवरूंक नाशिल्ले 13 स्टाॅल बंद केले. ताचे पयलीं फोंडें वाठारांत उण्या वजनाचे गॅस सिलींडर धरिल्ले. मडगांव शारांत भेसळ जिनस विकपी साबार जाणांची दुकानां, रांदचे कुडी सील केल्ल्यो. जात्रांनी फिरून गोबी मंच्युरियन स्टाॅलूय बंद केल्यात. ह्यो सगल्यो खबरो खुद्द सरकारी खात्यांनी, दिसाळ्यांनी सोशल मिडियाचेरूय घाल्यात. मात ताचे सकयले थोडे कमेंट वाचल्यार कांय लोक ह्या धाडींक वेगळो रंग दिवपाक सोदतात, हें स्पश्ट जाणवता. ‘हिंदूंच्या जात्रांक हेर धर्मीय वेपारी कित्याक?’ अशे कमेंट केल्यार गरज नासतना एका बऱ्या कार्याचेर उदक पडटलें, वयल्यान गोंयांतलो धर्मीक एकचार इबाडटलो, हें सगल्यांनी मतींत दवरल्यार बरें. कर्नाटकांत कांय दिसां पयलीं ‘चंपाषष्ठीचे जात्रेक हेर धर्मियांनी स्टाॅल घालचे न्हय’, असो फलकूच लायिल्लो. तें हांगा जावचें न्हय. गोबी मंच्युरियन स्टाॅल बंद करतात, ताचे फाटल्यान भलायकी हें एकसुरें कारण आसा. थंय नितळसाण आसना. चड प्रमाणांत खाल्यार लोक दुयेंत पडूं येतात, म्हूण सरकारी यंत्रणा सक्रीय जाल्या. आतां कांय देवस्थान समित्यांनीय गोबी मंच्युरियन स्टाॅल घालपाक बंदी केल्या. मात हें करतना तांणी हाॅटेलांनी हे आनी असले घातक थारूं येतात, अशे जिनस मेळचे नात, हाचीय जतनाय घेवची…. आनी जात्रांनीच कित्याक? हरशीय कोण हें विकता, नितळसाण दवरिनात, भेसळ करतात जाल्यार गांवकारांनी पंचायत, पालिका, सरकारी यंत्रणांचे नदरेक हें हाडून दिवचें. मात, सहसा कोणूच हें करपाक वचना. सरकार विरोधी संघटना, पक्ष पसून!
पुर्तुगेजांची सत्ता आसतना अधिकारी नुस्त्या बाजारांत पासय मारताले आनी पोंवटें नुस्तें सांपडत जाल्यार सरळ तातूंत पॅत्राॅल ओतून तें जप्त करताले, अशें सांगतात. घडये खरें आसतलें तें. तें धाडस आतांची सरकारी यंत्रणाय करपाक शकता. एफडीएन स्टाॅल बंद केल्यात. दुकानांक, उत्पादकांच्या रांदचे कुडींक सील मारलां, ते चडशे भायले वेपारी. म्हणटकच गोंयकार प्रामाणीकपणान सगले कायदे पाळून वेवसाय करतात, अशें समजुया. तरीय तांच्या दुकानांनी एक पासय मारची. घरगुती म्हूण नामना जाल्ल्या कांय जिनसांची पाकिटां तपासचीं. जीं आपमजत गटांच्या आनी हेर दुकानांनीय मेळटात. ताचेर जिनसाच्या उत्पादनाची आनी तो इबाडपाची तारीख, सरकारी नोंदणी क्रमांक, उत्पादकाचें नांव आसा जाल्यार तपासचें. हाॅटेलांनी कपां, बशयो धुंवपाची वेवस्था, थंयची नितळसाण, घाणयारें उदक भायर सोडपाची वेवस्थाय तपासपाक जाय. राज्या भायले कांय उत्पादक सुको मेवो, खावपाच्या जिनसांची गोंयांतल्या वेपाऱ्यांक पुरवण करतात, तांचो एकूणच दर्जो तपासपाचो वेळ आयला. कांय वेपारी एक्स्पायरी डेट जावनूय सामान मिस्तुराद करून दवरतात, तांचें कितें?
नुस्तें, फळां, भाजयो, फास्ट फूड गाडे, हाॅटेलांचेरूय नदर जाय. जिनसांच्या मोलाचेरुय निर्बंध जाय. गोंयांत 5- 10 रुपया म्हारग विकल्यार सहसा कोण हरकत घेना. ताचो गैरफायदो दर्यावेळो आनी हेर कडले वेपारी घेतात. तेंय पळोवचें. ‘स्मार्ट सीटीं’ त रस्ते खणपाचें काम फाटलें वर्सभर चालू आसा. नवीं कामां सुरू जाल्यांत. थंय धुल्ल आसप सभावीक. तरीय ह्या जाग्यांचेर कांय गाडे उबे आसात. सांजवेळा ‘स्मार्ट’ लोक थंय धुल्लाचो स्प्रे मारून भेळपुरी, रस्सा आॅम्लेट खातना दिसतात….
तपासणेच्या कामाचें वजें वाडटा जाल्यार एफडीएन सरकारी यंत्रणेंतल्या हेर घटकांची मजत घेवची. खावप आनी भलायकेचो लागींचो संबंद. एकदां खाल्यार कितें जाता, ही लोकांची मानसीकताय. निदान सरकारी यंत्रणांची ती नासची!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
