भांगरभूंय | प्रतिनिधी
पणजी: कांक्र दुयेंसा सयत हेर गंभीर दुयेंसां खातीर वर्साची रजा दिवपी येवजणेचो आतां मेरेन 7 शिक्षकांक लाव जाला. एका शिक्षकाची रजा मंजूर करपाची प्रक्रिया सुरू आसा, अशी म्हायती गोपां कडल्यान मेळ्ळी. हाका लागून येवजणचो 8 शिक्षकांक लाव जाला, अशें म्हणपाक हरकत ना. ही येवजण लावकारी आसा आनी उच्च माध्यमीक शिक्षक संघटणा सरकार तशेंच मुख्यमंत्र्यांचे उपकार मानता, अशें उच्च माध्यमीक शिक्षक संघटणेचे अध्यक्ष बाबाजी सावंत हांणी सांगलें.
कांक्र तशेंच किडणी, काळजाच्या दुयेंसा खातीर शिक्षकांक वर्सभर (365 दीस) रजा दिवपी खासा वैजकी रजा दिवपी सवलत सरकारान दिल्या. हे विशींचो आदेश 10 फेब्रुवारी 2026 दिसा जारी जालो. गोंय, दमण, दीव विद्यालयीन शिक्षण कायदो 1984च्या खाला हो आदेश जारी जाला. अॅडवान्स स्टेज कांक्र दुयेंस वा हेर गंभीर दुयेंसां खातिरूच उपचारा खातीर वर्साची रजा दिवपी ही सवलत आसा. मुळाव्या शिक्षका सयत उच्च माध्यमीक विद्यालयांत शिकोवपी शिक्षकां खातीर ही सवलत आसा.
आतां मेरेन बार्देस म्हालांतल्या 4, तिसवाडीतल्या 2 जाल्यार साश्ट आनी काणकोण म्हालांतल्या दरेकी 1 शिक्षकाक रजा मेळ्ळ्या. 8 पैकीं 7 शिक्षकांची रजा मंजूर जाल्या. दोतोरा कडल्यान शिफारस आयले उपरांत एका शिक्षकाची रजा मंजूर जातली. शिक्षण खात्याच्या गोपा कडल्यान ही म्हायती मेळ्ळी.
सध्या अॅडवान्स स्टेजीतल्या कांक्र दुयेंतीक रजा मेळटा. निदान जातकच रजा मेळपाक जाय. तरी लेगीत अॅडवान्स स्टेजीतल्या दुयेंतीक वर्साची रजा दिवपी गोंय हें देशातलें एकसुरें राज्य आसा. ही येवजण खूब लावकारी आसा, अशें अखील गोंंय उच्च माध्यमीक शिक्षक संंघटणेचे अध्यक्ष बाबाजी सावंंत हांंणी सांंगलें. कांंक्राच्या दुयेंतींक निदान जातकच रजा मेळपाक जाय, अशी दुरुस्ती आवश्यक आसा, अशें तांंणी सांंगलें.
गोंयांतल्या खूबशा शिक्षकांंक तरेकवार दुयेंसां आसात. कांंक्र दुयेंसाचें प्रमाण वाडत आसा. हाका लागून ही येवजण दुयेंसां आशिल्ल्या शिक्षकांंक पुरक थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
