भांगरभूंय | प्रतिनिधी
-उत्तरेंत मगोक सगल्यांत चड 6 खेपे, जाल्यार दक्षिणेंत काँग्रेसीक 10 खेपे जैत
पणजीः लोकसभा वेंचणुकेंच्या तिसऱ्या पांवड्यार गोंयच्या 2 मतदारसंघां खातीर मतदान जातलें. गोंय मुक्त जाले उपरांत उत्तर गोंयां खातीर जावपी ही सोळावी जाल्यार दक्षीण गोंयां खातीर जावपी सतरावी वेंचणूक आसा. आतां मेरेन उत्तर आनी दक्षीण मेळून मगो पक्षा वतीन सगल्यांत चड 7 जाण खासदार जाल्यात. दक्षीण गोंय मतदारसंघा खातीर 2007 वर्सा पोटवेंचणूक जाल्ली. हाका लागून दक्षीण गोंयांत उत्तरे परस लोकसभा वेंचणुकेंचो आंकडो एका आंकड्यान वाडलाे.
उत्तर गोंयांत आतां मेरेन जाल्ल्या 15 लोकसभा वेंचणुके मदल्या सगल्यांत चड 6 खेपे मगोन जैत मेळयलां. मगो उपरांत भाजपान 5 खेपे जाल्यार काँग्रेसीन 4 खेपे जैत मेळयलां. दक्षीण गोंयचो विचार केलो जाल्यार काँग्रेसीन सगल्यांत चड 10 खेपे जैत मेळयलां. युगो आनी भाजपान दरेकी 2 खेपे जाल्यार मगो आनी युगोडेपान दरेकी एकदा जैत मेळयलां.
तशेंच उत्तर गोंयांत आतां मेरेन केंद्रीय मंत्री श्रीपाद नायक हांणी सेगीत 5 खेपे (1999 ते 2019 मेरेन) जैत मेळयलां. उत्तर गोंयांत भाजपाचे एकलेच श्रीपाद नायक 5 खेपे खासदार जाल्यात. आतां ते उत्तर गोंयांत सेगीत सवे खेपे वेंचणूक लडयतात. काँग्रेस आनी मगोचे मात वेगवेगळे फुडारी खासदार जाल्यात.
दक्षीण गोंयांत काँग्रेसीचे एदुआर्द फालेरो हांणी सगल्यांत चड 5 खेपे लोकसभा वेंचणूक जिखल्या. तरी तांचो खासदारकीचो कार्यकाळ श्रीपाद नायक हांचे परस उणो आसा. एदुआर्द फालेरो हांचे उपरांत काँग्रेसीचे फ्रान्सीस सार्दीन हांणी 4 खेपे वेंचणूक जिखल्या. उत्तर गोयांत भाजपाचे एकलेच श्रीपाद नायक हे 5 खेपे खासदार जाल्यात. दक्षीण गोंयांत भाजपाचे रमाकांत आंगले (1999) आनी नरेंद्र सावयकार (2014) हे दोगूच जाण खासदार जाल्यात.
आतां मेरेन राज्यांत मगोचेच सगल्यांत चड 7 जाण (उत्तर गोंय 6, दक्षीण गोंय 1) खासदार जाल्यात. काँग्रेसीचे उत्तर गोंयांत 4 आनी दक्षीण गोंयांत 3 मेळून 7 जाण खासदार जाल्यात.
पक्षा वतीन खासदार जाल्ले फुडारी
महाराष्ट्रवादी गोमंतक पक्ष : उत्तर गोंय – पिटर अल्वारीस (1962), जनार्दन शिंक्रे (1967), अमृत कांसार (1977), संयोगिता राणे (1980), गोपाळराव मयेंकार (1989), रमाकांत खलप (1996).
दक्षीण गोंय- मुकुंद शिंक्रे (1962).
—-
काँग्रेस : उत्तर गोंय – पुरुषोत्तम काकोडकार (1971), शांताराम नायक (1984), हरिश झांटये (1991), रवी नायक (1998).
दक्षीण गोंय – एदुआर्द फालेरो (1977, 1980, 1984,1989, 1991), फ्रान्सिस सार्दीन (1998, 2007, 2009, 2019), चर्चील आलेमाव (2004).
भाजप : उत्तर गोंय – श्रीपाद नायक (1999, 2004, 2009, 2014, 2019)
दक्षीण गोंय – रमाकांत आंगले (1999), नरेंद्र सावयकार (2014).
युनायटेड गोवन्स : दक्षीण गोंय – इराज्मो सिक्वेरा (1967,1971)
युगोडेपा : दक्षीण गोंय – चर्चील आलेमांव (1996)
चर्चील आलेमांव दक्षीण गोंयांत युगोडेपा (1996) आनी काँग्रेस (2004) या पक्षांचेर जैतिवंत जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
