भांगरभूंय | प्रतिनिधी
मडगांव, प्रतिनिधी : नावेले फाटल्या ३० वर्सां सावन पडींग आशिल्ले जमनीचेर फाटल्या वर्सा सायपें फार्मर असोसिएशनान फा. जॉर्ज क्वाद्रोस हांच्या सहकार्यान १.६० लाख चौ.मि. जमिनीचेर भातशेती करून २० टन पीक घेतलें. अंदूं २.५० लाख चौ. मि. जमनीचेर लागवड करपाचें उद्दीश्ट दवरलां.
नावेलेच्या तळ्या लागसारा बिरेस्तारा सकाळीं पडींग जमनीचेर दुसरे फावट शेताची लागवड करपाक सुरवात केली. सायपें तळ्या लागसारची जमीन ३० वर्सां सावन पडींग आशिल्ली. ही जमीन परत पांचवीचार करपाक सायपे फार्मर असोसिएशना वतीन यत्न चालू आसात. मडगांव पालिका वाठारांतल्या सोडपी घाणयारें उदक ह्या शेतांतल्या व्हांविल्ल्यान ही जमीन कोणूच पिकोवपाक सोदिनाशिल्लो. असोसिएशनाचे अध्यक्ष आंतानिओ अल्वारीस हांणी हे विशीं न्यायालयांत याचिका दाखल केल्ली. आतां मडगांव पालिकेन ह्या घाणयार्या उदकाचेर उपाय काडल्यात.
शेतकारांक एकठांय हाडून कृषी विभाग, उदकास्त्रोत विभागाच्या सहकार्यान फाटल्या वर्सा सायपे तळ्या लागसारची १ लाख ६० हजार चौरस मिटर जमनीची लागवड केल्ली. ह्या शेतांतल्यान सुमार २० टन भाताचें उत्पादन घेतिल्लें. आतां सायपें फार्मर्स असोसिएशनान परत फा. जॉर्ज क्वाद्रोस हांच्या सहकार्यान पडींग जमनी मदल्या आनीक जमनी लागवडी खाला हाडपाचें उद्दीश्ट दोळ्यां मुखार दवरलां. हांगा बिरेस्तारा नितळसाणीच्या कामाक सुरवात जाली.
ह्या वेळार फा. क्वाद्रोस हांणी फाटल्या वर्सा परस चड जमनीचेर लागवड करतले. फाटल्या वर्सा १.६० लाख चौ.मि. शेत जमीन लागवडी खाला हाडिल्ली. ह्या वेळार ती २ लाख चौ. मि. करतले. मात अडेज लाख चौ. मि. जमनीचे लागवडीचें उद्दीश्ट दवरलां, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
