भांगरभूंय | प्रतिनिधी
‘ई बीट बुक मॅनेजमेंट सिस्टीम अॅपा’ चें अनावरण
पणजी ः मुख्यमंत्री डॉ. प्रमोद सावंत हांणी बुधवारा गोंय अभियांत्रिकी महाविद्यालयाच्या विद्यार्थ्यांनी तयार केल्ल्या ‘ई बीट बुक मॅनेजमेंट सिस्टीम अॅपा’ चें अनावरण केलें. हाचे वरवीं खरेंच एक पुलीस सांगिल्ले सुवातेर गेल्लो काय ना, तो फिल्डार हाजीर आसा काय ना हाची म्हायती पुलीस मुख्यालयांतले अधिकाऱ्यांक मेळटली. हे कार्यावळीक पुलीस महासंचालक जसपाल सिंग, महानिरीक्षक ओमवीर सिंग, अधीक्षक निधीन वाल्सन, प्राचार्य एम. एस. कृपाशंकर, प्रज्योत माईणकार आदी हाजीर आशिल्ले.
ह्या अॅपा वरवीं पुलिसांच्या कामांत पारदर्शकता येतली. केन्ना केन्ना पुलीस सांगिल्ले सुवातेर वचनात. ह्या अॅपा वरवीं ते खरेंच थंय गेल्ले काय ना हें कळटलें. तशेंच एका खाशेल्या वाठारांत वचून थंयचे फोटो अपलोड करूं येतात. ह्या अॅपाचो हेतू फकत पुलिसांचेर नदर दवरप न्हय. तर हाका लागून पुलिसांक म्हायती एकठांय करपाक आनी म्हायती सोदपाकय सोंपें जातलें. फुडाराक रेकॉर्ड सोदपा खातीरय ही पद्दत उपेगी पडटली अशें मुख्यमंत्र्यान ह्या वेळार सांगलें.
गोंय पुलिसांनी आयच्यान ही पद्दत वापरपाक सुरवात केल्या. अशें करपी गोंय हें देशांतलें पयलें राज्य. हाचे पयलीं लेगीत गोंयांत सुरू केल्ले बरे उपक्रम हेर राज्यांनीय चालीक लायल्यात. हे वेवस्थे विशीं आमी केंद्र सरकाराच्या गृह खात्याक सादरीकरण दिवपाचे आसात. हेर राज्यांनीय ताचो वापर करचो अशी शिफारस आमी करपाचे आसात अशें मुख्यमंत्र्यान हे वेळार सांगलें.
ह्या अॅपाचे फायदे...
० हो अॅप पुलिसांच्या मोबायलांत इंस्टॉल करतले.
० हाचे वरवीं तांचें लोकेशन कळटलें.
० ही पद्दत ऑनलायन तशेंच ऑफलायन आसा.
० खंयच्याय वाठारांत कायदो आनी सुवेवस्थेचो प्रस्न निर्माण जाल्यार अॅपा वरवीं अधिसुचोवणी दिवंक मेळटा.
० एका दिसांत बीट पुलिसांनी कितलें काम केलें हाची म्हायती मेळटली.
तलाठ्यां खातीरय अॅप हाडपाचो विचार…
फुडाराक आमी पंचायत खात्या खातीरय अशें अॅप हाडपाचो विचार करतात. ताका लागून तलाठी वा हेर अधिकारी फिल्डार हाजीर आसात काय ना हें कळपाक मजत जातली अशी म्हायती मुख्यमंत्री सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
