भांगरभूंय | प्रतिनिधी
वास्को मतदारसंघाचो आमदार कृष्णा (दाजी) साळकार हाणें आपले आमदारकीक दोन वर्सां पुराय जाल्ल्या निमतान फाटल्या आयतारा वास्को हांगा द्विवर्स पूर्ती उत्सवाचें आयोजन केल्लें. कार्यावळीचें स्वरूप अर्थात आपणे आमदार म्हणून फाटल्या दोन वर्सांत ज्यो उदरगतीच्यो येवजण्यो चालीक लायल्यात आनी मतदारसंघातली उदरगतीची गंगा फाटल्या आठ वर्सांत जी अडून आशिल्ली ती परत कशी व्हांवपाक लागल्या हें आपल्या मतदारांक दाखोवपा पुरती मर्यादीत आशिल्लें. सुमार पांच स हजारांची गर्दी हे कार्यावळीक आशिल्ली आनी भाजपा प्रदेशाध्यक्ष सदानंद तानावडे सयत मुख्यमंत्री डॉ प्रमोद सावंत आनी तांच्या मंत्रीमंडळांतले ज्येश्ठ वांगडी ह्या वेळार हाजीर रावल्ल्यान तिका वेगळेंच वलय मेळिल्लें. वास्को मतदारसंघांतल्या लोकांक उपेगी थारतल्यो अश्यो कांय उदरगतीच्याे येवजण्योय ह्या निमतान सुरू जाल्यो. ह्या लेखाचो विशय हो ना. पूण मुख्यमंत्री डॉ प्रमोद सावंत हांणी कार्यावळीचें उमेदी स्वरूप पळोवन एक दोन म्हयन्यांत जावपी लोकसभा वेंचणुकेचो प्रचाराचो नाल्ल फोडपाची हीच संद आसा हें समजून घेवन ह्या कार्यावळीचें प्रचार सभेंत रुपांतर केलें आनी राष्ट्रीय पांवड्यार सोडाच, सुपिल्ल्या गोंयांतूय भाजपान विरोधकांक कितलें फाटीं उडयलां हाचो प्रत्यय ह्या वेळार दिसून आयलो. गोंयांत विरोधी काँग्रेस आनी हेर कांय पक्ष सामके सुसेगाद आशिल्ल्याचें चित्र दिसता. तरीय विरोधकांक सामकें चिड्डून उडोवपाचे हीच रणनिती फुडें फुडें व्हरतना मुख्यमंत्री डॉ प्रमोद सावंत हांणी काँग्रेसीक आडे हात घेवपाची खंयचीय संद ह्या वेळार सोडली ना आनी कार्यावळीक हाजीर आशिल्ल्या मतदारांनी ताचो हो पवित्रो बरोच आवडलो हें दिसून आयलें.
वास्कोच्या ह्या कार्यावळीचें रुपांतर प्रचारसभेंत जाल्ल्याचें पळोवपाक मेळ्ळेंच शिवाय भाजपाक लोकसभा वेंचणुकेंत खऱ्यांनीच कोणूय सर्तक आसतलो काय आनी आसल्यार ताचें किदें जावपाक शकता हे प्रस्न मनांत घोळपाक लागले. जे पद्दतीन मुख्यमंत्री डॉ सावंत हांणी काँग्रेस पक्षाचेर हल्लो केलो आनी हाचे परस आतां मेरेन लोकांक फक्त ‘हात’ कसो दाखयलो हें ताणी फोड करून सांगलें आनी खासदार फ्रान्सीस सार्दीन हाचे कपडे कशे देंवयले तें पळयतकूच लोकसभा वेंचणुकेच्या प्रचाराचो नाल्ल फोडपा खातीर भाजपाक आनीक सभा घेवपाची गरज आसा अशें दिसना. गोंयांतूय काँग्रेस पक्षान भाजपाक मैदान पुराय मेकळें सोडलां अशेच चित्र सद्या काँग्रेस पक्षांत उमेदवार निवड आनी लोकसभा वेंचणुके विशीं जी पुराय उदासिनता दिसून येता ताचे वयल्यान म्हणपाक जाता. राष्ट्रीय पांवड्यार जाल्यार काँग्रेस पक्षाची इतली दैना जाल्ल्याचें जें चित्र दिसता तें पळयले उपरांत गोंयचो विचार केल्यार आडातूंच ना ते आडाब्यांत खंयच्यान येतलें हे पोरणे ओपारीचो प्रत्यय येता. गोंयांत काँग्रेस पक्षाची उमेदवारी स्विकारपाक अजूनय कांय जाण उत्तर आनी दक्षीण गोंयांत उडक्यो मारतात, हें जेन्ना हांव पळयतां तेन्ना ताचें अजाप तर दिसताच, पूण ताचे फाटलीं कारणां जागो जिखपा परस हेर कितें तरी आसतलें असो समज कोणे करून घेतल्यार ताचें नवल दिसचें ना.
उत्तर गोंय लोकसभा मतदारसंघांत काँग्रेस पक्षाचो एकलोच आमदार काँग्रेस पक्षाचो आधार आसतना आनी केंद्रीय मंत्री श्रीपाद नायक ह्या मतदारसंघांत सको मारपाक सज्ज आसतनाय ह्या मतदारसंघात उमेदवारी मेळोवपा खातीर काँग्रेसीचे तीन उमेदवार सर्तींत आशिल्ल्याचें पळोवन कोणाकूय अजाप दिसतलें. राजकारणांत चमत्कार जातात हें मानून घेतलें तरी उत्तर गोंयांत असो चमत्कार जातलो आनी काँग्रेसीचो उमेदवार वेंचून येतलो अशें कोणाक दिसता जाल्यार ताचेर कितें म्हणपाचें? विसांतल्या एकोणीस मतदारसंघांत काँग्रेस विरोधी आमदार प्रतिनिधित्व करतात जाल्यार अशीं कसली गणितां करतले की सगलें चित्र बदलपाक शकतलें हें तरी कळपाक जाय. सरकार पक्षाचे जे आमदार आसात तांकां आपल्या राजकी फुडाराचो हुस्को नासत जाल्यार मात असो चमत्कार घडपाक शकता, पूण आयज असो एकूय लोकप्रतिनिधी दिसना जाका आपल्या राजकी फुडाराचो हुस्को भेश्टयता. दक्षीण गोंय लोकसभा मतदारसंघांत हाचे परस दुसरें चित्र आसा अशें म्हणपाक जायना. मुरगांव तालुक्यांतल्या वास्को सयत चारूय विधानसभा मतदारसंघांत काँग्रेसीक चिड्डून उडोवपा खातीर थंयचे आमदार सज्ज जाल्यात. ताची थोडीशी झलक आमदार कृष्णा साळकार हाणें आयोजीत केल्ले कार्यावळींत दिसली. फाटलीं पांच वर्सा खासदार आशिल्ल्या फ्रान्सीस सार्दीन हांणी किदें केलें हाचो लेखाजोखा आतां मेरेन लोकां सामकार येवपाक जाय आशिल्लो. मात ते खातीर काम करपाची गरज आशिल्ली, असो प्रस्न काँग्रेसीचेच लोक करतात. अशे परिस्थितींत काँग्रेसीचो गोंय प्रभारी माणिकराव ठाकरे दोनूय सुवातो जिखपाची भास उलयतात तेन्ना ताची मजा दिसता.
प्रधानमंत्री नरेंद्र मोदी ‘अबकी बार चारशे पार’ असो नारो दितासतनाच वेंचणूक जाहीर जावपाची तारीख एक दोन दिसांचेर आयली तरी काँग्रेसी मदल्या राष्ट्रीय फुडाऱ्यांचो पक्ष सोडून भाजपांत प्रवेश करपाचो सिलसिला कायम आशिल्ल्याचें दिसता. सद्दां एक ना एक काँग्रेस फुडारी भाजपांत प्रवेश करता अश्यो बातम्यो आयकूंक मेळटात. हातूंतल्यान कसलो संदेश वता हें सांगपाची गरज आसा, अशें दिसना. गुजरात, महाराष्ट्र, आसाम, मध्य प्रदेश आनी केरळांत काँग्रेस पक्षाक जी व्हडलीं खांवटीं पडल्यांत ते उपरातूंय राहूल गांधी आनी ताचे चौकडीक लोकसभा वेंचणुकेंत किदें पदरांत पडटलें अशी आस्त दिसता जाल्यार ही चौकडी पिश्याच्या नंदनवनांत वावुरतना दिसता. आयज कश्मीरांतूय काँग्रेसीक कोणूच विचारना अशें जालां. पश्चीम बंगालांत ममता दिदीन असो फटको दिला ती तातूंतल्यान साल्वार जाय मेरेन लोकसभा वेंचणूक घडये जावन वतल्यो. राहूल गांधीचें वायनाड मदलें लोडणे आतां दाव्यांक चड जावपाक लागलां. आमी भाजपा आड लडपाचें सोडून हांगां आपलेच कडेन किद्याक लडटात हो तांचो प्रस्न आसा. हाची जाप सद्या स्वता राहूल तशेंच काँग्रेसी कडेन ना. ही परिस्थिती काँग्रेसीच्या रणनितीकारांनी आपूण जावन हाडल्या. राहूल गांधीच्या भारत जोडो न्याय यात्रेक गंठबंधनातल्या सगल्याच पक्षांक पयलींच आस्पावन घेतिल्लें आशिल्लें जाल्यार घडये आयज वेगळेंच चित्र दिसतलें आशिल्लें. काँग्रेसींत राष्ट्रीय पांवड्यार जें चित्र दिसता ताचे परस वेगळें अशें गोंयांत घडना वा दिसनाय, ताका लागून लोकसभा वेंचणुकीचो गोंयांतलो निकाल पयलींच स्पश्ट जाल्ले कडेन आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
