भांगरभूंय | प्रतिनिधी
सुर्ला पालक- शिक्षक संघटणेची शिटकावणी
वाळपय, प्रतिनिधी ः ठाणे पंचायत वाठारांतल्या सुर्ला सरकारी माध्यमीक शाळेंत नियमीत मुख्याध्यापकाची नेमणूक करची. सध्या नेमिल्लो मुख्याध्यापक वेळार शाळेंत येना. हाका लागून शाळेचें प्रशासकीय काम उरता. भुरग्यांच्या शिक्षणाचेर ताचो परिणाम जाता. पालक- शिक्षक संघटणेन जायते फावट हे संबंदी निवेदन शिक्षण खात्याक सादर केले. पूण अजून मेरेन पूर्णवेळ मुख्याध्यापकाची नेमणूक जावंक ना. आठ दिसां भितर पूर्णवेळ मुख्याध्यापकाची नेमणूक जाली ना जाल्यार विद्यार्थी वर्गाचेर बहिश्कार घालतले अशी शिटकावणी पालक- शिक्षक संघटणेन दिल्या.
चड म्हायती प्रमाण, संघटनेन हे संबंदी शिक्षण खात्याच्या संचालकांची भेट घेतली. तांकां शाळेची परिस्थिती सांगली. पूण ताचो कसलोच परिणाम जावंक ना. ताका लागून संघटना तिडकल्यात. संघाची अध्यक्ष गायत्री गणेश गांवकार हिणें पत्रकारां कडेन उलयतना सांगलें, आतां कसलीच तडजोड करचे नात. फाटल्या स म्हयन्यां सावन भुरग्यांक शिक्षणीक नदरेन त्रास जाता. शिक्षण खात्याक हें संबंदी सांगून लेगीत कांयच करीनात. आतां बहिश्कार घालपाचो सोडून हेर कसलोच पर्याय उरलो ना. आठ दिसां भितर पूर्णवेळ मुख्याध्यापकाची नेमणूक जाली ना जाल्यार विद्यार्थी वर्गाचेर बहिश्कार घालतले अशी शिटकावणी पालक शिक्षक संघटणेन दिल्या.
मजगतीं, पंदरा दिसां आदीं संघटणेन हेर पालकांच्या हाजिरेंत शिक्षण अधिकाऱ्यांची भेट घेतली. ही खबर दिसाळ्यांनीय उजवाडाक आयली. पूण ह्या जाग्यार काम करपी मुख्याध्यापकान हे विशीं वाळपयच्या पुलीस स्टेशनात कागाळ केली. उपरांत संघटणेच्या एका वांगड्याक वाळपय पुलिसांनी आपयलो. हाचेर पालक शिक्षक संघटणेन नाराजी उक्तायल्या. उल्लेख केल्ल्या वांगड्याक पुलीस स्टेशनांत कित्याक आपयलो असो प्रस्न पालक शिक्षक संघटणेन केला. शिक्षणीक समस्या सोडोवपाक वांटो घेवपी नागरिकांक पुलिसांचो भंय घालून तांकां ओगी करपाचो हो यत्न आसा काय कितें असो प्रस्न संघटणेन केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
