भांगरभूंय | प्रतिनिधी
पणजीः राज्यांत लोकसभा वेंचणुके खातीर आचारसंहिता १६ मार्चा सावन लागू जाली. १६ मार्च ते २२ एप्रील ह्या काळांत राज्यांतल्यान १६ कोटी ६५ लाख ५२ हजार ५७२ रुपया मोलाचो माल जप्त केला. हातूंत रोख, ड्रग्स, सोरो, भांगर- रुपें सारकिले मोलादीक धातू आनी हेर वस्तूंचो आस्पाव आसा.
ह्या काळांत राज्यांतल्या विवीध खात्यांनी ही कारवाय केल्या. तातूंत रेल्वे पुलीस, एनसीबी, कस्टम, अबकारी खातें, पुलीस खातें, येणावळ कर आनी वेवसाय कर विभाग हांचो आस्पाव आसा. हातूंत येणावळ कर खात्यान ४.६ कोटी रुपया रोख आनी ३.०३ कोटी रुपयांची मोलादीक धातू जप्त केल्या. अबकारी खात्यान ३.४३ कोटी मोलाचो ६२ हजार ९४९ लिटर सोरो जप्त केला.
हाचे भायर पुलीस खात्यान २.४६ कोटी रुपयांचे ड्रग्स, ७४ लाख रुपया मोलाचो ३० हजार ५४६ लिटर सोरो, सुमार ९ लाख रुपया रोख जप्त केल्या. वेवसायीक कर विभागान १.३५ कोटी रुपयांचो फुकट भेटवस्तू जप्त केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
