भांगरभूंय | प्रतिनिधी
पणजी, प्रतिनिधी : लोकसभा वेंचणुकेंत उत्तर गोंय मतदारसंघांत आचारसंहितेचे कार्यवाही खातीर वेंचणूक आयोगान खर उपाय येवजण्यो केल्यात. कागाळीची नोंद करून कारवाय करपा खातीर २३ घोळट्या पंगडांची वेवस्था केल्या. तशेंच १६ गस्ती पंगड, १२ विडीयो विवींग पंगड आनी २० विडीयो गस्ती पंगडांची वेवस्था केल्या. सगळ्या मतदारांनी मतदानांत वांटो घेवचो, अशें आवाहन उत्तर गोंय जिल्होधिकारी स्नेहा गिते हांणी केलां.
गिते हांणी पत्रकार परिशदेंत वेंचणूक कार्यावळीची म्हायती दितना हे वेवस्थेचीय म्हायती दिली. संवेदनशील बुथ सोदून काडपाची प्रक्रिया सुरू जाल्या. उत्तर गोंय जिल्होधिकारी कार्यालयान नियंत्रण कक्षाचीय स्थापना केल्या.
उत्तर गोंयांत ५ लाख ७७ हजार ९७७ मतदार आसा. दादले मतदार २,८०,२६० जाल्यार महिला मतदार २,९७,७१४ आसात. उत्तर गोंय मतदारसंघांत २० विधानसभा मतदारसंघ आसात. पुराय उत्तर गोंयांत ८६३ मतदान केंद्रां आसात. सगळ्या मतदान केंद्रांचेर शेड, पियेवपा खातीर उदक, नितळसाण घर, रॅम्प, वील चॅर तशेंच हेल्प डेस्काची वेवस्था आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
