भांगरभूंय | प्रतिनिधी
एक कामगार लाशिल्ल्याचो दुबाव पुलिसांनी उक्तायला
काणकोण, प्रतिनिधी : आगोंद धवळ खाजनांतल्या दोन शॅक्सांक मंगळारा रातीं उजो लागून तांचो गोबोर जालो. हातुंतल्या एका शॅकाच्या उज्यांत एक कामगारा लाशिल्ल्याचो दुबाव पुलिसांनी उक्तायला. पुलीस ताचो सोद घेतात.
काणकोण पुलिसांनी दिल्ले म्हायती प्रमाण, आगोंदच्या शिवलिंग चलवादी आनी मनोज पागी हांणी मूळ धनया कडल्यान हे शॅक्स भाड्याक चलोवपाक घेतिल्ले. मंगळारा रातीं शिवलिंग चलवादीच्या शॅकांत वेल्डींग मारून दुरुस्तीचें काम चलतालें. काम जाले उपरांत वेल्डींग मारपी राजस्थानी आनी कर्नाटकांतले कामगार न्हिदपाक गेल्ले. रातच्या सुमार १.०५ मिनटांनी काणकोण उजो पालोवपी दळाक उजो लागपाची म्हायती मेळटांच उजो पालोवपी दळ घडणुके सुवातेर पावलें.
उज्याचो नेट इतलो व्हड आसलो की तो माडा परस चड उंचायेर पाविल्लो. ताका लागून काणकोणच्या उजो पालोवपी दळाचे मुखेली धिरज देसाय हांणी कुंकळ्ळ्यां, कुडचड्यां, मडगांवच्यान उजो पालोवपी दळाक बंबा खातीर संपर्क केलो. लाखांनी लिटर उदक मारले उपरांत बुधवारा सकाळीं हो उजो नियंत्रणांत आयलो. ह्या उज्याक लागून शॅकान आशिल्ल्या सगळ्या सामानाचो गोबोर जालो तशेंच शिवलिंग चलवादी हांच्या शॅकाच्या कुशीक आशिल्ल्या शॅकाचोय गोबोर जालो. उजो लागिल्ल्यान शॅकांनी आशिल्ल्या सिलिंडरांचोय स्फोट जालो. उपरांत उजो सगळ्याक पातळ्ळो.
ह्या उज्यांत एक कामगारूय लाशिल्ल्याचो अदमास आशिल्ल्यान काणकोण पुलिसांनी शॅक्स धनयांक काणकोण पुलीस स्टेशनार आपोवन ताचे कडल्यान सगळी म्हायती घेतली. कामा खातीर आयिल्लो एक कामगार बेपत्ता आशिल्ल्यानचें शॅक धनयान सांगलें. शॅकांच्या गोबरांत कांय भाग सांपडल्यात ते मनशाचे अवयव काय आनी कोणाचे हें तपासपा खातीर काणकोण पुलिसांनी फोरेंसीक तज्ञां कडेन संपर्क केला.
काणकोणचे पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
