भांगरभूंय | प्रतिनिधी
विरेश बोरकारः गाडी आगशी पुलिशेच्या ताब्यांत
भांगरभूंय । प्रतिनिधी
पणजीः सांत आंद्रेंचे आदले आमदार फ्रान्सीस सिल्वेरा हांची काळ्या हारश्यांची गाडी पयशें वाटपाक भोंवता, असो आरोप सांत आंद्रेंचे आरजीपीचे आमदार विरेश बोरकार हांणी करून ते गाडयेचो फिल्मी स्टायलीन फाटलाव केलो. उपरांत ती गाडी आडावन घोळट्या पंगडाचे सुवादीन दिली. घोळट्या पंगडान गाडयेची तपासणी करून ती आगशी पुलिशेच्या ताब्यांत दिली.
आमदार बोरकार हांणी दिल्ले म्हायती प्रमाण आगशीच्या पाया वाठारांत फ्रान्सीस सिल्वेरा हांचो भाव आंतोन सिल्वेरा हाची जीए 06 ए 5351 नंबराची काळ्या हारशांची गाडी पयशे वांट्टना दिसली. आमी रोखडोच घोळट्या पंगडाक फोन केलो. आमकां पळयले उपरांत गाडी थंयच्यान गेली. आपले गाडयेंतल्यान ते गाडयेचो फाटलाव केलो. ही सगळी घडणूक फेसबुकाचेर लायव्ह केली. गाडयेचो फाटलाव करतना ती गाडी खंय पावल्या ताची म्हायती वेळावेळार घोळट्या पंगडाक दिताले. ती गाडी हायवे सोडून ल्हानश्या रस्त्यान वचून एका बंगल्या कडेन रावली आनी गाडयेचो चालक देंवून बंगल्यार वचून आयलो आनी गाडी परतून घेवन गेलो. आमकां चुकोवपा खातीर अशीर रस्त्यार ताणें गाडी व्हेली. पूण आमी दिल्ले म्हायतीच्या आदारान घोळट्या पंगडान ती धरली.
घोळट्या पंगडाच्या अधिकाऱ्यांनी गाडयेची तपासणी केली आनी उपरांत फुडले कारवाये खातीर ती जप्त करून आगशी पुलिशेचे सुवादीन दिली. सिल्वेरा हांच्यो अश्यो कितल्योश्योच गाडयो आसात ज्यो आतां राती वेळार पयशे वांटपाक भोंवतल्यो. ही गाडी पाया वाठारांत खूब तेप आशिल्ली. आमी जेन्ना थंयसर पावले तेन्ना घोळट्या पंगडाक फोन केलो. काळे हारशे आशिल्ल्यो गाडयो आडावन तांची तपासणी करप सक्तीचें केलां. तरी लेगीत नाकाबंदी करपी पुलीस ह्यो गाडयो आडयनाशिल्ले, असो आरोप बोरकार हांणी केला.
येरादारी खातें फक्त बातां मारता आनी बारीक मनशांक तालांव दिता. पूण अश्या काळ्या हारशांचे गाडयेंचेर कसलीच कारवाय करिना. आमी विधानसभेंत हो मुद्दो कितलेशेच खेपे काडलो, पूण सरकारान कानार केस ओंडल्यात, अशें बोरकार हांणी सांगलें.
आचारसंहिता मोडिल्ल्यान भाजपा आड कागाळ
आयतारा सांजेच्या 5 वरांचेर प्रचार सोंपता आनी घराघरांनी वचपाक राजकी पक्षांक मनाय केल्या. तरी लेगीत चिंबल वाठारांत सांजेच्या 5 वरां उपरांत भाजपाचे कार्यकर्ते कमळ चिन्न आशिल्ल्यो पावत्यो घराघरांनी वांट्टाले, असो आरोप आरजीपीचे भंडारी अजय खोलकार हांणी केला. ह्या प्रकरणांत तांणी मुख्य वेंचणूक अधिकाऱ्या कडेन भाजपा आड कागाळ दाखल केल्या. आयतारा सांजेच्या 5.30 ते 6 वरां मजगतीं भाजपाचे कार्यकर्ते अनधिकृत मतदान वळखपत्रांच्यो पावत्यो सांताक्रूझ मतदारसंघाच्या विभाग 5 त भोंवताले. त्या पावत्यांचेर भाजपाचें चिन्न आनी नांव आशिल्ले, असो आरोप करून खोलकार हांणी भाजप आनी उत्तर गोंयचे उमेदवार श्रीपाद नायक हांचे आड कागाळ नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
