भांगरभूंय | प्रतिनिधी
सीताराम रावत: निधीचो व्हडा प्रमाणांत जाता गैरवेव्हार
पेडणें, प्रतिनिधी : आगरवाडो, चोपडें पंचायतींत पंचायत कर्मचार्यां कडल्यानूच चुकीचे पद्धतीन कर वसुली जाल्ल्यान ह्या निधीचो व्हडा प्रमाणांत गैरवापर जाल्ल्याचो आरोप आदले सरपंच सीताराम उर्फ अमोल रावत हांणी केला.
हे विशीं चड म्हायती दितना रावत हांणी म्हणलें, आगरवाडो चोपडें पंचायतींत सोंपो कराची वसुली पंचायत कर्मचारी करता. मात ते खातीर दिल्ले पावतेचेर सिरीयल नंबर नाशिल्ल्यान, तशेंच पावतेची दुसरी प्रत (कॉपी) नाशिल्ल्यान दर दिसा कितली कर वसुली जाता हाची खरी म्हायती मेळना. ताका लागून ह्या निधीचो व्हडा प्रमाणांत गैर वेव्हार जाता असो म्हजो दावो. हे विशीं पंचायतीन योग्य तो खुलासा करचो तशेंच दिल्ल्या पावत्यांचेर सिरीयल नंबर घालचो अशी मागणी तांणी केली. तशेंच वेंचणूक आचार संहिता लागिल्ल्यान जावंक नाशिल्ली सोपो कराची पावणी बेगीनूच करची अशीय मागणी तांणी केली.
दरेके पंचायतींत सोपो कराची पावणी मार्च म्हयन्यांत करतात. मात आचार संहितेक लागून सोपो कराची पावणी जावंक ना. ताका लागून फाटल्या कांय म्हयन्यां सावन सोपो कराची वसुली पंचायत कर्मचारीच करतात. सोपो वसुली करतना दिवपी पावते वयलो नंबर घालिनाशिल्ले अशें सांगून तांणी नंबर नाशिल्ली पावती दाखयली. ताका लागून ह्या सोपो कर वसुलींत हजारांनी रुपयांचो घोळ जाल्ल्याचो आरोप तांणी केलो.
ह्या प्रकाराची खर चवकशी करपाची मागणी रावत हांणी केली. तशेंच आपले मर्जेंतले व्यक्तीक सोपो कराची पावणी मेळचे खातीर पंचायत मंडळ सोपो कराची पावणी वेळार करिना असो आरोपूय तांणी केलो. पेडणें म्हाल गट विकास अधिकार्यांनी हे विशीं चवकशी करची अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
