भांगरभूंय | प्रतिनिधी
आवयक अत्यवस्थ अवस्थेंत व्हेली हॉस्पिटलांत
मडगांव: आक्यां पॅरडायज अपार्टमेंटांत भितरल्यान बंद आशिल्ल्या फ्लॅटांत जुबेर खान (29) आनी आफान खान (27) ह्या दोगां सख्ख्या भावांच्यो कुडी सांपडल्यो. मडगांव उजो पालोवपी दळान दार मोडून कुडी भायर काडल्यो. जाल्यार तांची आवय रुकसाना खान (54) ही लेगीत त्याच फ्लॅटांत आशिल्ली. तिका अत्यवस्थ अवस्थेंत हॉस्पिटलांत दाखल केल्या. हे घडणुकेचो तपास मडगांव पुलीस करतात.
आक्यां पॅरडायज अपार्टमेंटांत ए 3 मदल्या दुसऱ्या माळ्या वयल्या फ्लॅट क्रमांक तिनांत ही घडणूक घडली. ह्या फ्लॅटांत जुबेर, आफान आनी रुकसाना हें कुटूंब रावतालें. ह्या भुरग्यांचो बापूय नझीर तांचे सयत रावनाशिल्लो, पूण तांचे येवप-वचप आसतालें. भुरग्यांनी दोन दीस फ्लॅट उक्तो केलो ना हाका लागून ते पुलिसां कडेन गेले. पुलिसांनी उजो पालोवपी दळाच्या आदारान दार मोडलें तेन्ना जुबेर आनी आफान हे दोगूय मरण आयिल्ले अवस्थेंत दिसून आयले. तांची कूड सुकिल्ली आनी घरांतल्यान वास येतालो. ताका लागून तांणी खूबशे दीस कांयच खाल्लें नासुये अशें कुडी पळयतकच दिसून येतालें.
रुकसाना ही भायले कुडींत चादर घेवन न्हिदिल्ले अवस्थेंत सांपडली. तिची भलायकी लेगीत इबाडिल्ली. पुलिसांनी तिका हॉस्पिटलांत दाखल केली, आनी दोनूय कुडी दक्षीण गोंय जिल्हो हॉस्पिटालांत मरणा उपरांतचे तपासणे खातीर व्हेल्यात.
मेळिल्ले म्हायती प्रमाण जुबेर खान आनी आफान खान हातूंतलो एकलो सिव्हील इंजिनीयर जाल्यार एकल्यान बिकॉम केल्लें. जुबेराचें लग्न जाल्लें पूण तो घरकान्न आनी भुरग्यां सयत रावनाशिल्लो. तशेंच तांच्या घरांतल्यान झगडीं जायत आशिल्ल्याचो आवाजय अदीं मदीं येतालो अशें शेजाऱ्यांचें म्हणणें आसा. मडगांव पुलीस ह्या प्रकरणाचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
