भांगरभूंय | प्रतिनिधी
पणजी : आकय-म्हापशेंच्या श्री सिमेश्वर राष्ट्रोळी ब्राह्मण देवस्थानाच्या ट्रस्टची नोंदणी आनी सीसीटीव्ही कॅमेरे बसोवपावेल्यान जाल्ल्या वादांतल्यान दोन गटां मदीं ताण निर्माण जालो. हे घडणुकेंत दोनाय गटां मदीं मारामारी जाली. हातूंत सात जाण जखमी जाले. तिगांक उपचारा खातीर गोमेकॉंत दाखल केले. उपरांत उपचार करून तांकां घरा धाडले. ह्या प्रकरणांत साईराज तोरसकार आनी जयेश कळंगुटकार गटान एकमेकां आड पुलिशेंत कागाळी दाखल केल्यात.
हेरांचेर मुळाव्या पांवड्यार उपचार सुरू आसात. घडणुकेची म्हायती मेळटांच पुलिसांनी घडणुके सुवातेर धाव घेवन परिस्थिती नियंत्रणांत हाडली. सध्या ह्या वाठारांत शांतिकाय आशिल्ल्यान पुलिसांनी ह्या प्रकरणाचो तपास सुरू केला.
ह्या वादाचें नेमकें कारण आनी जापसालदार आशिल्ल्या लोकांची चवकशी करतात. थळाव्या प्रशासनान नागरिकांक शांतता राखपाचो उलो मारला. देवळाच्या वाठारांत पुलीस बंदोबस्त वाडयला. पुलीस यंत्रणां कायदो आनी सुवेवस्था सांबाळपाक यत्न करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
