भांगरभूंय | प्रतिनिधी
सुदैवान कसलीच वायट घडणूक घडली ना
केपें: केपें म्हालांतल्या आंबावली पंचायत वाठारांत येवपी सरकारी माध्यमीक हायस्कुलाचे पत्रे वार्यान हुबून गेले. सुदैवान कसलीच दुर्दैवी घडणूक घडली ना.
केपें सावन कुंकळ्ळी वचपी रस्त्याचे कुशीक सरकारी माध्यमीक हायस्कूल आसा. ह्या पंचायत वाठारांत हें एकूच स्कूल आसा. पूण फाटल्या कांय दिसां सावन गोंयांत नेटाचो पावस आनी वारें व्हांवत आशिल्ल्यान हाचो फटको ह्या हायस्कुलाक बसलो.
काल दनपारां 1.30 वरांच्या सुमाराक स्कूल सुटपा वेळार नेटाचें वारें आयिल्ल्यान हायस्कुलाच्या दुसर्या माळ्या वेले पत्रे हालपाक सुरवात जाली. ह्या वेळार वर्गांत बशिल्ले विद्यार्थी भियेले आनी सकयल आयले तेन्नाच दुसर्या माळ्या वेले पत्रे सकयल पडले.
सुदैवान कसलेंच व्हड लुकसाण जालें ना. हे घडणुके उपरांत बरोच बोवाळ जालो. ऐन वेळार सगलीं भुरगीं सकयल देंविल्ल्यान कसलीच वायट घडणूक घडली ना.
हे घडणुकेची म्हायती मेळटकच केपेंचे उपजिल्होधिकारी मनोहर कारेकार, मामलेदार नाथन आफोन्सो, सरपंच देविदास देयकार, प्रभाग पंच वांगडी एवेत्ता रानिया कार्दोस हांणी पळोवणी केली. ह्या वेळार रोखडीच दुरुस्ती करची अशे आदेश संबंदीत खात्याच्या अधिकार्यांक दिल्यात.
कांय वर्सां पयलीं जीएसआयडी वतीन पत्रे घाल्ले. ते कितल्या दर्जाचे जाल्यात हाचेर संबंदीत खात्याच्या अधिकारी वर्गान लक्ष दिवंक नाशिल्ल्याचें स्पश्ट दिसून येता. हाचेर ताकतिकेन कारवाय करची अशी मागणी पालक वर्गान केल्या.
मजगतीं, काल सांजवेळा उसरां विद्यार्थ्यांचो विचार करून शिक्षण खात्यान एक परिपत्रक काडून तीन दीस सुटी जाहीर केल्या. ह्या तीन दिसां भितर संबंदीत खात्यान विद्यालयाचे हुबून गेल्ले पत्रे आनी हेर कामां रोखडीच करतले अशें समजता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
