भांगरभूंय | प्रतिनिधी
खबरां संस्था
कोलकाताः कोलकाता नायट रायडर्स (केकेआर) पंगडांत खेळपी कॅरेबियन खेळगडो आंद्रे रसेलान आयपीएलांतले आपले 200 सके पुराय केल्यात. सनरायझर हैदराबाद आड खेळटना ताणे 25 बॉलांत 7 सके आनी 3 चौक्यांनी नाबाद 64 धांवड्यो करून नायट रायडर्सांक 4 धांवड्यांनी जैत मेळोवन दिलें.
इंडियन प्रीमियर लीग सर्तींत (आयपीएल) 200 परस चड सके मारपी आंद्रे रसेल 9 वो बॅट्समन थारला. वेस्ट इंडिजाचे क्रिस गेल आनी किरॉन पोलार्ड हांच्या नांवार लेगीत 200 परस चड सके आसात.
आयपीएलांत सगल्यांत चड 357 सके क्रिस गेलाच्या नांवार आसात. भारतीयां वतीन व्हो विक्रम रोहीत शर्माच्या नांवार आसा.ताणे 256 सके मारल्यात. 200 परस चड सके मारपी बॅट्समनां मदीं भारताचे चार आनी वेस्ट इंडिजाचे तीन खेळगडे आसा. दक्षीण आफ्रिका आनी ऑस्ट्रेलियेचो दरेकी एक बॅट्समन आसा.
डावांत 15 सके
सनरायझर्स हैदराबादान (एसआरएस) शेनवारा रातीं केकेआर वांगडा खेळटना आपल्या डावांत 15 सके मारले. अशे तरेन आयपीएलांत एका डावांत सगल्यांत चड सके मारपी तो पंगडा थारला. हाचे पयलीं 2019 च्या सिझनांत तांणी रॉयल चलेंजर्स बंगळुरून आनी राजस्थान रॉयल्सा आड दरेकी 13 सके मारिल्ले.
हैदराबादच्या हॅन्रीक क्लासनान कोलकाता आड 8 सके हुबयले, ताणे 2017 वर्सा डेव्हीड वॉर्नरान कोलकाता आनी 2020 वर्सा राजस्थाना आड दरेकी 8 सके मारल्ले. ताचे कडेन क्लासनान बोरोबोरी केल्या. विशेश म्हणल्यार क्लासनान आपल्या 63 धांवड्याचे खेळींत एक लेगीच चौको मारलो ना. सगले सके आशिल्ले. एके खेळींत चौको मारनासतना सगल्यांत चड सके मारपी तो खेळगडो थारला. ताचे पयलीं व्हो विक्रम नितीश राणा, संजू सॅमसन आनी राहुल तेवतिया हाच्या नांवार आशिल्लो. राणान 2017 वर्स पंजाब किंग्सा आड, सॅमसनान 2017 वर्सा गुजरात लायन्स आनी तेवतियान 2020 वर्सा पंजाबा आड देरकी 7 सके मारिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
