आंतोनेत मेंडीस: पर्जळीत नखेत्र ना जालें

भांगरभूंय | प्रतिनिधी

एप्रिलाचे 7 तारखेर कोंकणी तियात्र माचये वयली गुणेस्त कलाकार आंतोनेत मेंडिस संवसारांतल्यान अंतरली.
आंतोनेत मेंडीस हांचें कुटुंब मूळ तिसवाडे पोरण्या गोंयचें. तिचो जल्म 1944 वर्सा मुंबयंत जाल्लो. 14 वर्सां पिरायेर तिणें तियात्रांत काम करून आपल्या अभिनय कारकिर्दीक सुरवात केली. मुखार तियात्र मळार एक गोड ताळ्याची गावपी आनी अश्टताशी कलाकार म्हूण फाकीवंत जाली.
फाटलीं कितलींशींच वर्सां ती कोंकणी तियात्र मळार वावुरताली. तिचो बापूय ए. के डिसोजा लेगीत तियात्र कलाकार, निर्मातो, दिग्दर्शक आशिल्लो. 1960 वर्सा आंतोनेत मेंडीस हिणें “हांव तो तारवटी” ह्या बापायल्या तियात्रांत नायिका म्हूण माचयेर पयलेच खेप पावल दवरलें.
आंतोनेताक तियात्रांत नाचपाची मात लेगीत खोशी नाशिल्ली. पूण बापायन काम करपा खातीर केल्ली विनवणी ती टाळूंक शकली ना. ही संद तिका कोंकणी तियात्र माचये वयलें पर्जळीत नखेत्र करपी थारली .
सुरवातेक तिणें उदेंत आफ्रिकेंतल्या तियात्र भोंवडेर मारिया आंतोनिया ह्या नांवांन तियात्रांत काम केल्लें म्हूण त्याच नांवान लोक तिका वळखताले.
आंतोनेत, गायन आनी अभिनयांत फिशाल आशिल्ल्यान त्या तेंपार तिणें तियात्र मोगीच्या काळजांत खाशेली सुवात तयार केल्ली. तियात्रांत आंतोनेत आसा हें कळना फुडें तियात्र हाऊस फुल्ल जातालो. ती गावपाक माचयेर येतकच प्रेक्षक ताळयांनी येवकार दिताले. कोंकणी तियात्र माचयेर तिणें गायिल्लीं कांतारां ” नांव म्होजें काय बोरें इस्कोलास” आनी ग्रेग हांचे सांगातान ” म्हाका बोरीच भायरी पोडली” बरीच लोकप्रिय जाल्लीं.
आंतोनेत हिणें गायिल्लीं कांतारां..
सर्गेस्त आल्फ्रेड रोज हांचें ” सुकणें, काजारी भोयणीक लागोन, सावकारालो पोर, नोरसीचें फुगासांव, क्रीस पेरी हांचे ” पिटी पिटी मोग” रॉबिन वाज हांचे ” मार खावा आनी पिपीरमींट ” ज्यो रोज
हांचे ” तिकळयें आनी बेब्दे”. हेर कांतरां ” पिशें, दोतोर न्हंवरो, गल्फांत पावल, घात म्हाकां, व्होडपोण, पायची गिरेस्तकाय, आसात.
तिणें गायन अभिनय केल्लो “आमचें नोशीब” हो सिनेमा बरोच गाजलो चड करुन तातूंतली सर्गेस्त एन्थनी मेंडीस हांचे वांगडा गायिल्ली दोन गितां ” भेकणांयता पाय” ” मोगाचें तारूं ” बरींच लोकप्रिय जालीं. आंतोनेत मेंडीसान “निर्मोण “आनी “सुकण्यांचें सोपोन”तशेंच ” जोबाबदारी ” ह्या टेलिगफिल्मांत लेगीत काम केलां. एम. बॉयर हांगेल्या तियात्रांत कांतरा गायना लागून तिगेली खुब तुस्त जाल्ली.
जे. पि. सौझोलीन, किड बॉक्सर, मास्टर वाज, सी. आल्वारिस, प्रेम कुमार, आलफ्रेड रोज, एम बॉयर, अनिल कुमार, क्रीस पेरी, टीटा प्रीटो, यच. ब्रिटोन,जासींतो वाज, रेमी कुलासो हांचें तियात्रांनी अभिनय केल्लो. तिगेली चड तोखणायेक पात्र थारिल्यो भुमिका म्हणल्यार प्रेम कुमार हांचें “आंगवोण” एम बॉयर हांचे “सोंवसार सुधारलो ” आनी किड बॉक्स हांचे “फुडार” तियात्रांतल्यो. तशेंच जोस रॉड हांगेल्या ” मावली ” नॉन स्टॉप शोवांत आंतोनेतान भेस बरी भुमिका केल्ली.
आंतोनेत मेंडिस हिणें आपले कारकिर्दीत “अपघात ” “तूं सायबा कोण”? खोंयचें म्होजें घोर “नांवांच्या तिन तियात्रांचें लेखन केलां. तिगेल्या बाप्पायन बरयिल्लो ” दिलेलो जुरामेंत “तियात्र तिणें दिग्दर्शीत करुन माचयेर हाडलो.”जिवीत येक सोपोन ” “वालांकीनी,” “रायतूरची” ह्यो तिगेल्यो गायनाच्यो कॅसेटी.
जगदीश नौरोला हांचे ” मोहब्बत जिंदगी हैं ” चित्रपटात आंतोनेतान विनोदी भुमिका केल्या. सायरस मिस्ट्री हांचे इंग्लिश ” The legacy of Rage ” नाटकांत आपल्या भितर आशिल्ल्या बळग्याचेर दुसऱ्याचेर प्रभाव घालपी एका अस्तुरेची भुमिका केल्ली. आपल्या सोबीत गायनान तिणें हेर कलाकारांक कॅसेटी काडूंक पालव दिल्लो. तिगेल्या कॅसेटींचें विमोचन हिंदी फिल्मी कलाकार अनिल कपूर, गोविंदा, हेमा मालिनी हांचे हस्तुकीं जाल्लें. “जिवीत एक सोपोन ” कॅसेटीचें विमोचन अमिताभ बच्चन हांचे हस्तुकीं जाल्लें. तेन्ना तो कोंकणी उलयिल्लो आयकुंक मेळटा.
आंतोने मेंडिस हांगेले तियात्र शो जर्मनी, कॅनडा, आफ्रिका, इंग्लंड, गल्फांत लेगीत जाल्यात. आयज लेगीत तिगेलीं कांतारां आकाशवाणीचेर प्रसारित जातात. तिणें 1966 वर्सा तियात्रीस्ट रोमिओ मेंडीस हाचे लागीं काजार केलें. रोमियो आनी आंतोनेत मेंडीस घोव बायलाचें जोडप्यान मुंबय दूरदर्शनाचेर जायत्यो कार्यावळी केल्ल्यो.
आंतोनेत मेंडीस हिणें कोंकणी मळार केल्या वावरा खातीर “The Goan Review “, Gulab “, ” Great Goan coca cola award”,”
गोवा राज्य सांस्कृतिक पुरस्कार” फावो जाल्यात.

सुदिन वि. कुर्डीकार
8275425404