भांगरभूंय | प्रतिनिधी
आमचे चार तरणाटे गगन यान मोहिमे खाला अंतराळांत वचपाचे आसात. ही घोशणा भोवमानेस्त प्रधानमंत्री नरेंद्र मोदीजी हांणी विज्ञान दिसा केली. चवगांचेंय प्रशिक्षण बंगळुरूंत सुरू जातलें. ते चार तरणाटे जावन आसात, प्रशांत नायर, अजित कृष्णन, अंगद प्रताप आनी शुभांशु शुक्ल. सगले लश्करांतले. ही मोहीम येशस्वी जाली जाल्यार भारत अंतराळांत मनीस धाडपी देशां मदीं भारत चवथो देश थारतलो. सध्या अमेरिका, रशिया आनी चीनान अंतराळांत मनीस धाडल्यात. गोंयांत हालींच विज्ञान दिसाच्यो जायत्यो कार्यावळी जाल्यो. इस्रोचे विज्ञानीक तातूंत वांटेकार जाल्ले.
फोंड्यां प्रथमोपचार अकादमी सुरु जाल्ल्यान एक बरी गजाल जाल्या. कारण आयज गोंयांत दरदिसा एकतरी अपघात जाता. हातूंत दुचाकी वाहनां चड आसतात. तांकां अपघात जावपाची शक्यतायूय चड आसता. तुमी जर हेल्मेट वापरलें ना जाल्यार जीव वचपाची शक्यताय चड. आतां कांय कारणांक लागून प्रत्येक गोंयकार वाहन चलयता. हाका लागून फुडें फाटीं लायसन्स दितना ताका प्रथमोपचाराची म्हायती आसप गरजेचें आसा. कायद्यान हें जाता तेन्ना जाता, पूण एक नैतिक जापसालदारकी म्हूण आपणें प्रथमोपचार शिकप गरजेचें. शाळा, काॅलेजांनी असलें गिन्यान घेवपाची संद आसता, हें जरी खरें आसलें तरी मागीर हें आमी विसरतात काय कितें, हो प्रस्न वाडटे अपघात पळोवन विचारशें अशें दिसता.
आयज भोवतेक सगलेच बेरोजगार तरणाटे सरकारी नोकरेच्या फाटल्यान लागल्यात. सरकार आपले परीन नोकरी दिवपाचे यत्न करता, पूण आमी चिंतपाक जाय की सगल्यांकूच सरकारी नोकरी मेळप शक्य ना. हाचे खातीर आमी ल्हान- व्हड उद्देग सुरू करपाचे वाटेन वचपाक जाय. लश्कराचो वयर उल्लेख आसा, पूण आमचे भोवतेक गोंयकार तरणाटे लश्कराक व्हडलेशें म्हत्व दिनात. एक म्हणल्यार हातूंत अर्थीक सुरक्षा तर आसताच, खेरीज देशसेवा करपाची संद लेगीत आसता. सोशल मिडियाचेर आयज जायते राष्ट्राभिमानी तरणाट्यांचें लिखाण वाचपाक मेळटा. देशसेवा तिगून उरली जाल्यार स्वाभिमानूय तिगून उरतलो. प्रत्येकान राष्ट्राभिमान जागृत केलो जाल्यार आमकां लश्करांत वचपाक उमेद येतली. हाची वेबसायटूय आसा. दर वर्सा ह्या फांट्यांत नोकरेची जायरात येत आसता. भारतीय नौदळांत आंकवार तरणाट्यां कडल्यान शॉर्ट सर्विस कमिशना खातीर अर्ज मागयल्यात. पंदरा सुवातो आसात. अशी म्हायती तुमकां तांच्या संकेत थळाचेर वाचपाक मेळटली. ( www.joinindiannavy. gov)
फोंडें आनी पर्वरी ह्या दोन सुवातींनी तुमकां इत्सा आसल्यार मॉन्टेसरी आंतरराष्ट्रीय डिप्लोमा कोर्स (जो सरकार मान्य आसा.) तो करपाक मेळटा. जागे मर्यादित आशिल्ल्यान तुमी बेगीन ह्या कोर्साक प्रवेश घेवचो. मॉन्टेसरी ही इटालियन बायल, जिका भुरग्यां विशीं मोग आशिल्लो. हो कोर्स केले उपरांत तुमी स्वताची मॉन्टेसरी सुरु करूं शकतात वा नोकरी करूं शकतात. व्हडल्या विद्यार्थ्यांक शिकोवचे परस ल्हान माणकुल्या भुरग्यांक शिकोवप चड कठीण. एक म्हळ्यार भरपूर संयम जाय. ते खेरीज हेर कुशळटाय गरजेची.
1) International Accreditation Organization (IAO)- USA, 2) All India Association for Educational Research, 3) All India Council of Education, 4) The Indian Society for Training & Development (ISTD), 5) The Association for Early Childhood Education & Development (AECED), 6) ISO 9001:2008 Certification
ह्या वयल्या संस्थांची तांकां मान्यताय मेळ्ळ्या. 50 % गुण घेवन बारावी पास जाल्लो खंयच्याय फाट्याचो विद्यार्थी प्रवेश घेवं शकता. हो कोर्स स म्हयन्यांचो. दोन म्हयने तुमकां प्रॅक्टिकल अणभव घेवपाची सुविधा लेगीत आसा. फक्त धा उमेदवार प्रत्येक बॅचीक आशिल्ल्या कारणान तुमचेर वैयक्तिक लक्ष दिवपाक मेळटा. जरी तुमी स म्हन्यांचो कोर्स करता तरी तुमका डिप्लोमा वर्साचो केला, अशी सर्टिफिकेट संस्था दिता. सप्तांतल्यान तीन खेपो वर्ग आसतात. तुमी हाची चड म्हायती 9823304027 ह्या फोनाचेर घेवं शकतात. आयच्या काळांत तुमचे लागीं कसलो तरी कोर्स आसपाक जाय. तुमचें शिक्षण थांबून उपकारना.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
