भांगरभूंय | प्रतिनिधी
१० ते १३ मेरेन जातलीं नाटकां सादर
काणकोण, प्रतिनिधी: बादल सरकार जे तरेन गांवच्यो सुविधा वापरून नाटक सादर करताले तेच आंगण माचये वेले संकल्पनेंतल्यान नाट्य महोत्सवाचो आस्वाद घेवपाक काणकोण तशेंच गोंयच्या रसिकांक संद मेळटली. ह्या नाट्यमहोत्सवाचें आयोजन ज्येश्ठ पत्रकार संदेश प्रभुदेसाय आनी तांच्या कुटुंबीयांनी आगस माशे हांगा केलां. आपल्या पुर्वजांचे बागायतींत आनी कुळागरांत हें नाटक जातलें. ‘मनोशोभा कलाघर’ म्हळ्यार आपलीं आवय-बापूय सुटके झुजारी मनोहर आनी शोभा प्रभुदेसाय हांणी कला, संस्कृती, शिक्षण मळांचेर काम केलां. तांच्या ह्याच कामाक समर्पीत म्हणून ‘मनोशोभा कलाघर’ हो अभिनव उपक्रम प्रभुदेसाय कुटुंबीयांनी सुरू केला. सैमीक सांवळेंत ही उक्ती रंगमाची तयार केल्या. सुमार ४०० रसीक प्रेक्षकांक बसपाची हांगा वेवस्था आसा.
शोभा आनी मनोहर प्रभुदेसाय हांचे पूत आनी नाट्यकर्मी स. संजीव प्रभुदेसाय हांच्या नांवान ‘कालोत्सव’ आयोजीत केला. ह्या कालोत्सवांत तीन मराठी आनी एक हिंदी अशीं चार नाटकां जातलीं. १० मेक सांजेवेळार ५ वरांचेर ह्या कलाघराचें उक्तावण जातलें. ह्या वेळार मुखेल सोयरे म्हणून कला अकादमीच्या नाट्य महाविद्यालयाचे प्राचार्य डॉ. राजय पवार, नाट्यकर्मी प्रकाश आचार्य आनी सुनीता गावणेकार उर्फ रतन प्रभुदेसाय हाजीर आसतलीं. ह्या मानेस्तां हस्तुकीं ह्या प्रकल्पाचें उक्तावण जातलें.
उक्तावण सुवाळ्याक प्रभुदेसाय जोडप्यान सादर केल्ल्या आनी तांचे वांगडा नाटकांत भुमिका केल्ल्या नाट्य कलाकारांचो भोवमान करतले. कार्यावळी उपरांत ६ वरांचेर नाट्यप्रयोगाक सुरवात जातली. २ ते अडेज वरांच्या ह्या नाटकांक प्रेक्षक वर्गान व्हडा संख्येन हाजीर रावचें असो उलो संदेश प्रभुदेसाय हांणी आगस माशें हांगा घेतिल्ले पत्रकार परिशदेंत मारलो. ह्या वेळार नाट्य दिग्दर्शक केतन जाधव आनी संध्या कामत हाजीर आशिल्लीं.
शुक्रारा पयल्या दिसा ह्या प्रकल्पांतल्या आंगणांत नाट्यकर्मी स. विजयकुमार नायक हांणी बरयल्लें आनी साईनंद वळवयकार दिग्दर्शीत ‘अमर अमृता’ ह्या मराठी नाटकाचो प्रयोग जातलो. ११ मे दिसा शिवप्रणव आळवणी हांणी बरयल्लें ‘केल्लुरितला नाटक’ ह्या मराठी नाटकाचो एकपात्री प्रयोग स्वता लेखक सादर करतले. १२ मेक सतीश तांडले हांणी बरयल्लें आनी केतन जाधव दिग्दर्शीत ‘बोरो’ हें हिंदी नाटक जातलें. निमाण्या दिसा अभिषेक दुखांडे हांणी बरयल्लें ‘हयवदन’ ही अभिनव नाट्यकृती चित्रकथे वरवीं स्वता लेखक सादर करतले.
मजगतीं, ३६५ दीस ह्या कलाघरांत विवीध तरेच्यो कार्यावळी आयोजीत केल्यो. हातूंत राष्ट्रीय आनी आंतरराष्ट्रीय विशयांचेरूय परिसंवाद जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
