भांगरभूंय | प्रतिनिधी
एका बॅगेचें मोल 430 रुपया; सरकाराचो पयसो उदकांत
फोंडें: गोंय सरकाराच्या बायलां आनी भुरगीं उदरगत खात्या वतीन आंगणवाडीच्या भुरग्यांक दितात तो पुश्टीक पदार्थ सद्या कोयराच्या रुपान रस्त्यार उडयिल्ले अवस्थेंत दिसून येता. जागृताय करून लेगती लोक किंमती पदार्थ रस्त्यार उडयत आशिल्ल्यान सरकाराचो पयसो फुकट वता. लोकांनी पुश्टीक पदार्थाचो वापर करून भुरग्यांक खावपा खातीर दिवपाची गरज आसा. बायलां आनी भुरगीं उदरगत खात्या वतीन जागृताय करून लेगीत लोक पुश्टीक पदार्थ वापरिनासतना रस्त्यार उडयत आशिल्ल्यान निरशेवणी उक्तावंक लागल्या.
बायलां आनी भुरगीं उदरगत खात्या वतीन दर म्हयन्याक आंगणवाडीच्या भुरग्यांक तशेंच भुरग्यांचे आवयक सुखीन नांवाचे पुश्टीक पदार्थ दितात. दर म्हयन्याक अदमाशेक एका बॅगांत 430 रुपया मोलाचें पुश्टीक पदार्थ दितात. हाचे पयलीं आंगणवाडीच्या भुरग्यांक कड्डण दिताले. पूण लोकांक वेळ मेळनाशिल्ल्यान तशेंच उण्या वेळांत पदार्थ तयार करपा खातीर खात्या वतीन सुखीन नांवाचें उत्कृश्ट पोशण पुरक पदार्थ दितात. पूण खूबशे लोक ह्या भरिल्ल्या पदार्थाचें बॅग कोयराच्या पेटलांत व्हरून उडयतात.
मंगळारा सकाळीं फोंडें पालिके कुशीक रस्त्याचे कुशीक एक पदार्थ आशिल्ले बॅग दिसून आयलें. हें सुखीन नांवाचें बॅग रस्ताद सुण्यांनी खावन उडयलें. बँगेंतलें साहित्य पळोवन खूबशा जाणांनी सुण्यांक धांवडावपाचो यत्न केलो. पूण बॅगेंत सुखीन नांवाचें पदार्थ पळोवन अनवळखी मनशान हेतुपुरस्सर रस्त्याचे कुशीक बॅग उडयिल्ल्याचें खूबशा जाणांच्या लक्षांत आयलें. कारण अशा प्रकारचीं खूबशीं बॅगां कोयर एकठांय करपी लोकांक कोयराच्या पेटलांनी दिसून येत आशिल्ल्याची म्हायती मेळ्ळ्या.
फोंडें म्हालांत वट्ट 166 आंगणवाडी केंद्रां आसात. तातूंत 66 आंगणवाडी भाड्याचे कुडीत घेतात. सगल्या आंगणवाडी केंद्रांतल्या भुरग्यांक आनी गुरवार बायलांक दर म्हयन्याक पुश्टीक पदार्थ दितात. पूण लोक चडांत चड पदार्थ सुण्यांक घालतात वा कोयराच्या पेटलांत व्हरून उडयत आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
