भांगरभूंय | प्रतिनिधी
-सुमार 3.30 लाखांचें लुकसाण, जिवितहानी जावंक ना
पणजीः गोंयात दोन दीस पडिल्ल्या अाडवेळ्या पावसाक लागून विवीध वाठारांनी 67 झाडां पडपाच्यो घडणुको घडल्यो. चडश्यो घडणुको फोंडें म्हालांत घडल्यांत. ह्या घडणुकेंत 3 लाख 30 हजारांच्या मालमत्तेचें लुकसाण जालें, अशी म्हायती पालोवपी दळान दिल्या.
फाटल्या शेनवारा 20 एप्रीलाक अचकींत पडिल्ल्या अाडवेळ्या पावसान गोंयभर धुमशेण घातिल्लें. त्या दिसा झाडां पडपाच्यो घडणुको घडल्यो आनी दुसऱ्या दिसा पावसान विसव घेतले उपरांतूय कांय झाडां पडपाच्यो घडणुको घडल्यो. उजो पालोवपी दळांक गोंयभरच्यान अशें 67 कॉल्स आयले आनी उपरांत घडणूक सुवातेर वचून तांणी आडमेळी पयस केल्यो. ह्या घडणुकेंत कसलीच जिवितहानी जावंक ना आनी ते भायर 1.43 कोटी रुपया इतली मालमत्ता वाटावपाक उजो पालोवपी दळाक येस आयलें.
सगळ्यात चड 11 घडणुको फोंडें म्हालांत घडल्यांत जाल्यार दुसरे वळेरेंत 6 घडणुके सयत पणजेचो नंबर लागता. जाल्यार तिसऱ्या नंबराचेर आशिल्ले पर्वरी वाठारांत चार घडणुको घडल्यात. चिंबल, मडगाव आनी मेणकुऱ्या दरेकी तीन जाल्यार दिवचल, कुट्टी, नागव्यां आनी सुकुरांत दरेकी दोन घडणुको घडल्यात.
म्हाला प्रमाण बार्देशांत 12 घडणुको, दिवचले 6, सत्तरी 3, फोंडे 17, तिसवाडी 17, मुरगांव 1, साश्ट 5, धारबांदोडें 1, सांगें 1, केपें 1 आनी काणकोण 3 ह्याच म्हालांनी झाडा पडपाच्यो घडणुको घडल्यात.
मजगतीं, ह्या तालुक्यांनी चड झाडां पडपाच्यो घडणुको घडल्यो. फोंडें- 17, तिसवाडी- 17, बार्देस- 12 आनी दिवचले 06 झाडां पडपाच्यो घडणुको घडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
