भांगरभूंय | प्रतिनिधी
दिवचल, व्हाळवाट, कुडणें न्हंय प्रदुशणाच्या चपक्यांत; उपाय येवजण आंखपाची गरज
भांगरभूंय । प्रतिनिधी
दिवचलः मानवी उतिक्रमणां, वाडटें प्रदुशण, दुशीत रसायनीक आनी घाणयारें उदक न्हंयेंत सोडपाची वाडिल्ली मानसिकता हाका लागून दिवचल म्हालांतल्या न्हंयांचो स्वास घुस्पटला. ह्यो जिवनदायिनी बाराय म्हयने प्रवाहीत दवरचे खातीर थळावे लोकप्रतिनिधी, राज्य सरकार, समाजीक संस्थांनी वेळारूच फुडाकार घेवन उपाय येवजण आंखली ना जाल्यार फुडारांत व्हड संकश्ट येतलें.
व्हाळवाट न्हंयेचो उगम आंबेखोल वाठारांत जाता. तुका थोरली न्हंय, वाळवंटी न्हंय अशेंय म्हणटात. वझरा सखला हें व्हाळवट न्हंयेचें एक रूप.
सांखळी आनी सरभोंवतण्या वाठारांत हे न्हंयेची खोलाय आनी रुंदाय आदीं खूब आशिल्ली. थंय वेपारा खातीर येवपी बोटी लागताल्यो. गोड्या उदकाची ही न्हंय सांखळे येवपी भरती- सुकतेक लागून खाऱ्या उदकाची जाता. हे न्हंयेंत रुचीक नुस्तें मेळटालें. कांय प्रमाणांत ते अजून लेगीत मेळटात.
ह्या वाठारांतली लोकजीण गिरेस्त करपी हे न्हंयेचेर आयज सुवार्थाक लागून अत्याचार जातात. न्हंयेदेगेर लागवड, बांदकामां खातीर फातर, स्फोटकांचो वापर, हुंवार येवपाची शक्यताय आशिल्ल्या वाठारांत बांदकामां केल्ल्यान ही न्हंय प्रदुशणाच्या चपक्यांत सांपडल्या आनी ती अस्तित्वा खातीर संघर्श करतना दिसता.
दिवचल न्हंयेचेर प्रदुशणाचें व्हड संकश्ट आयलां. गटारांतलें घाणयारें उदक सोडप, उद्देगीक वसणुकेंतलें रसायनीक उदक सोडप, प्लास्टीक कोयर तशेंच हेर तरांचो कोयर न्हंयेच्या पात्रांत उडोवप हाका लागून दिवचल न्हंय मृत जावपाचे वाटेर आसा. वेळारूच ते विशीं जागृताय केली ना जाल्यार दिवचल न्हंयेची गिरेस्तकाय नश्ट जातली, अशी भिरांत ज्येश्ठ नागरीक तानाजी पळ हांणी उक्तायल्या. न्हंयांची भलायकी सुदरावपा खातीर रिव्हर टास्क फोर्सची थापणूक करप, तज्ञांची नेमणूक करून न्हंयांचो स्टेटस अहवाल तयार करप, जिलेटीन ब्लिचींग पावडरीक न्हंय वाठारांत बंदी घालप, परंपरीक नुस्तें मारपाक प्राधान्य दिवप, हुंवाराची शक्यताय आशिल्ल्या वाठारांत बांदकाम परवाने दिवपाचें बंद करप, सैमीक प्रवाह सुरळीत करचे, न्हंयेंत घाणयारें उदक सोडप्यांचेर तशेंच कोयर उडयतल्यांचेर कारवाय करप गरजेचें आसा. सरकारी दरबारांत अधिसुचोवणी काडून न्हंयांचें संरक्षण जावचें हे खातीर विशेश यत्न करपाक जाय. कोस्टल बेल्टचे धरतेर ह्यो उपाय येवजण्यो आंखून कांयद्याची खर अंमलबजावणी करची. अश्यो उपाय येवजण्यो आंखून दरेक मतदारसंघातल्यो न्हंयो सांबाळपा खातीर समित्यो घडोवन मतदारसंघांतले आमदार, पंचायत मंडळ, पालिका मंडळ हांकां जापसालदारकी दिवची. अश्यो साबार सुचोवण्यो निश्चीत तरेन चालीक लागल्यो जाल्यार न्हंयांचें अस्तित्व तिगोवप शक्य जातलें.
लोकजागृती खातीर फुडाकार घेतलेः आमदार
न्हंयो प्रवाहीत उरल्यो जाल्यारूच मानवी अस्तित्व, रानां, पर्यावरण, सुकणीं- सावजां तिगतलीं. ते खातीर दरेका मतदारसंघांत जागृती जावप गरजेचें आसा. ताका लागून दिवचल मतदारसंघांत लोकजागृती करपाक फुडाकार घेतले, अशें दिवचलचे आमदार डॉ. चंद्रकांत शेट्ये हांणी सांगलें.
कोयर उडयतल्यांचेर जातली कारवायः नगराध्यक्ष
न्हंय निवळ दवरचे खातीर दिवचल पालिका मंडळ सगळे तरेची मजत करपाक तयार आसा. न्हंयेच्या पात्रांत कोणेय कोयर उडयल्यार ताचेर रोखड्या रोखडे कारवाय करतले, अशें दिवचलचे नगराध्यक्ष कुंदन फळारी हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
