भांगरभूंय | प्रतिनिधी
नोंदणी खातीर वेंचणूक आयोगा कडेन अर्ज
काँग्रेस सरचिटणीस वेणुगोपाल आयज गोंयांत
भांगरभूंय । प्रतिनिधी
पणजी : प्रदेश अध्यक्षपदाचेर गिरीश चोडणकार हांची नेमणूक जाले उपरांत असंतुश्टां कडल्यान गोवा काँग्रेस पार्टी स्थापन करपाच्यो हालचाली सुरू जाल्यात. गोवा काँग्रेस पार्टीचे नोंदणे खातीर केंद्रीय वेंचणूक आयोगा कडेन अर्ज दाखल जावपाचे फाटभुंयेर काँग्रेस सरचिटणीस के. सी. वेणुगोपाल आयज गोंयांत येतात.
काँग्रेसीचे राष्ट्रीय सरचिटणीस के. सी. वेणुगोपाल हांच्या फुडारपणा खाला फाल्यां शेनवारा म्हत्वाच्यो बसका जातल्यो. दनपारां राजकी वेव्हार समितीची बसका जातली. हाचे उपरांत प्रदेश कार्यकारिणीक वेणुगोपाल मार्गदर्शन करतले, अशी म्हायती काँग्रेसीचे प्रभारी माणिकराव ठाकरे हांणी दिली.
अमीत पाटकार हांची ‘उचलबांगडी’ जावन गिरीश चोडणकार हांची नेमणूक जाले उपरांत कांय कार्यकर्ते नाराज आसात. दक्षीण गोंयचे खासदार विरियातो फर्नांडीस हांणी जाहीरपणान ही नाराजी उक्तायल्ली. आदले अध्यक्ष अमीत पाटकार हे जरी काँग्रेस पक्षांत आसले तरी हकालपट्टी उपरांत पक्षकार्यांत ते सक्रीयपणान वांटो घेनात. दोन सप्तकां पयली स्मार्ट मिटरा आड पणजे विद्यूत भवनांत तांच्या फुडारपणा खाला आंदोलन जाल्लें. ह्या आंदोलनांत काँग्रेस कार्यकर्ते वांटेकार जाल्ले. मात हें आंदोलन काँग्रेसीचें न्हय अशें स्पश्टीकरण प्रदेश अध्यक्ष गिरीश चोडणकार हांणी दिलें. हाका लागून गिरीश चोडणकार आनी अमीत पाटकार हांचे मदीं मतभेद आशिल्ल्याचें स्पश्ट जालां.
हे फाटभुंयेर प्रदेश काँग्रेस अध्यक्ष गिरीश चोडणकार तशेंच अमीत पाटकार हांचे कडेन वेणुगोपाल चर्चा करून स्थिती समजून घेतले.
गोवा काँग्रेस पार्टीचे नोंदणीक लागून खवदळ
अमीत पाटकार आनी ताचे समर्थक नाराज आशिल्ल्याचे फाटभुंयेर गोवा काँग्रेस पार्टीचे नोंदणी खातीर केंद्रीय वेंचणूक आयोगा कडेन अर्ज आयला. कोणाच्यो हरकती आसल्यार त्यो 30 दिसां भितर सादर करच्यो, अशी नोटीस जारी जाल्या. फ्रान्सिस्को अंतोनियो (जासिंतो गोवेया, वेळसांव) हे पार्टीचे अध्यक्ष आसतले. डायना गोवेया, वेळसांव- कांसावली, मुरगांवां ह्या पक्षाचें कार्यालय आसतलें. वामन गांवकार (मयें- दिवचल) हे उपाध्यक्ष जाल्यार रोहिदास गडेकार (सुकूर – बार्देस) हे पक्षाचे सरचिटणीस आसतले. लोकप्रतिनिधित्व कायदो 1951च्या कलम 29 (ए) खाला पक्षाच्या नोंदणे खातीर अर्ज केला.
ह्या पक्षाची नोंदणी जाले उपरांत काँग्रेसींतले असंतुश्ट ह्या पक्षांत प्रवेश करतले, अशी चर्चा आसा.
नव्या पक्षा विशीं कांयच खबर ना : ठाकरे
नव्या पक्षा विशीं म्हाका कसलीच म्हायती ना. पक्षाचेर सरचिटणीस के. सी. वेणुगोपाल हे गोंयांतली राजकी स्थिती समजून घेवपा सयत वेंचणुकेचे तयारी खातीर येतात. पक्षाचे राजकी वेव्हार समितीची बसका तांच्या फुडारपणा खाला जातली, अशें काँग्रेसीचे प्रभारी माणिकराव ठाकरे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
