भांगरभूंय | प्रतिनिधी
भांगरभूंय प्रतिनिधी
पणजी : रामनमीक लागून 30 मार्चाक सुटी आशिल्ल्यान अर्थसंकल्पी अधिवेशन फक्त 4 दिसांचें जातलें. पयलीं ते 5 दिसांचे जावपाचे आसलें. विधानसभा सचिवांनी अधिसुचोवणी जारी केल्ल्यान अधिवेशन 4 दिसांचें जातलें. अधिवेशनाचो कार्यकाळ 5 दिसां वयल्यान 4 दिसांचेर आयिल्ल्यान विरोधी काँग्रेस तशेंच गोवा फॉरवर्ड पक्षान टिका केल्या.
गोंय विधानसभेचें अर्थसंकल्पीय अधिवेशन 27 मार्च ते 31 मार्च मेरेन जातलें. राज्यापालांनी हाचे पयलीच अधिवेशनाचे समन्स जारी केल्यात. समन्स जारी केले उपरांत आतां विधीमंडळ सचिवांनी 30 मार्चाक सुटी आशिल्ल्यान कामकाज जावचें ना, अशी अधिसुचोवणी जारी केल्या.
सरकार विरोधकांक भियेता : युरी आलेमांव
डॉ. प्रमोद सावंत सरकाराक लोकांच्या प्रस्नाचेर भासाभास जाल्ली नाका. हाचे खातीर सरकारान अधिवेशन 5 दिसां वयल्यान 4 दिसांचें केलां. 30 मार्चाक रामनमीची सुटी आसा. ही सुटी दिवन एक दीस अधिवेशनाचो कार्यकाळ वाडोवपाक जातालो. सुटी दिवन अधिवेशनाचो एक दीस उणो करप हो आमदारांचेर अन्याय आसा. डॉ. प्रमोद सावंत सरकार विरोधकांक भियेता, हे हाचे वयल्यान सिद्ध जाता, अशें विरोधी पक्ष फुडारी युरी आलेमांव हांणी म्हणलें.
रामाच्या नांवान विरोधकांचेर अन्याय : विजय सरदेसाय
रामाच्या नांवान अधिवेशनाचो कार्यकाळ एक दीस उणो करप हो विरोधी आमदारांचेर अन्याय आसा, अशें आमदार विजय सरदेसाय हांणी म्हणलें. रामनमीची सुटी दिवन अधिवेशनाचो एक दीस वाडोवप शक्य आशिल्ले. हाचे पयली असो कार्यकाळ वाडयल्या. रामनमीची पुराय देशांत सुटी आसता. तेन्ना रामनमीची सुटी ही मर्यादीत सुटी कित्याक? असो प्रस्न आमदार विजय सरदेसाय हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
