भांगरभूंय | प्रतिनिधी
एप्रील सावन अर्थसंकल्प लागतलो चालीक
पणजी : अर्थसंकल्पांतल्यो घोशणा तशेंच येवजण्यांचो लाव लोकां मेरेन पावचो म्हूण कार्यवाहेचो नियाळ मुख्यमंत्री सेगीत घेतले. एप्रील सावन अर्थसंकल्पाची कार्यवाही जातली म्हूण हांवें वावर सुरू केला अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. प्रमोद सावंत हांणी 2023 – 2024 अर्थीक वर्सा खातीरचो अर्थसंकल्प बुधवारा विधानसभेंत सादर केलो. अर्थसंकल्प सादर करपाच्या आदल्या दिसा तांणी फाटल्या वर्साच्या अर्थसंकल्पाच्या कार्यवाहेचो अहवाल सभाघरांत सादर केलो. कसलीच शुल्कवाड करिनासतना राज्याक स्वयंपूर्ण करपी अर्थसंकल्प आशिल्ल्याचें निवेदन मुख्यमंत्र्यांनी अर्थसंकल्पी भाशणांत केलें. 26 हजार 844 कोटींच्या ह्या अर्थसंकल्पांत सगल्या खात्यां खातीर भरीव अर्थीक तजवीज आसा.
अर्थसंकल्पांतल्यो चडशो घोशणा ह्यो कागदारूच उरतात. तांची कार्यवाही जायना. विरोधी पक्ष फुडारी युरी आलेमांव हांणी लेगीत घोशणा चड आनी कार्यवाही उणी अशी खर टिका अर्थसंकल्पाचेर केल्या. हे टिकेक जाप दितना अर्थसंकल्पाची रोखडीच कार्यवाही जातली अशें मुख्यमंत्र्यांनी सांगलें. अर्थसंकल्प सादर करचे पयलीं हांव आदल्या अर्थसंकल्पाच्या कार्यवाहेचो अहवाल सादर करता. कार्यवाहेचो अहवाल सादर करपाची ही दुसरी खेप आसा. अर्थसंकल्पांतल्या घोशणांचो म्हाका उगडास आसता. अंदूं अर्थसंकल्पाच्या कार्यवाहेचो नियाळ हांव घेतलों अशें तांणी सांगलें.
2022 – 2023 वर्साच्या अर्थसंकल्पाची 34 टक्के पुर्तताय जाल्या. पुर्ततायेचें प्रमाण उणें आसलें तरी 105 घोशणांची कार्यवाही सुरू आसा. ह्यो घोशणा येता त्या वर्सा मेरेन पुराय जातल्यो अशें अहवालांत स्पश्ट केलां. अर्थसंकल्पाच्या कार्यवाहेचो अहवाल सादर करपी डॉ. प्रमोद सावंत हे पयले मुख्यमंत्री आसात. विधानसभा वेंचणूक जावन अर्थसंकल्प सादर करपाची तांची ही दुसरी खेप आसा. विधानसभा वेंचणुके पयलीं दोन खेपे तांकां अर्थसंकल्प सादर करपाची संद मेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
