भांगरभूंय | प्रतिनिधी
खबरां संस्था
दोहाः दोन फावटचो संवसारीक फुटबॉल वस्ताद अर्जन्टिनान कतारांत चलिल्ले संवसारीक फुटबॉल सर्तींतलें आपलें आव्हान जितें दवोरलां. सर्तींतले पयलेच मॅचींत सावदी अरेबिया कडल्यान हार खावपी लियोनल मेसीच्या अर्जेन्टिनान मॅक्सिकोचेर 2-0 गोलानी जैत मेळयलें. मात नॉक आवट फेरयेंत प्रवेश करपा खातीर 1 डिसेंबराक तांकां पोलंडा आडची निमणी लीग मॅच जिखची पडटली.
अर्जेन्टिना खातीर लियोनल मॅसी आनी एंजो फर्नांडो हांणी गोल केले. मेसीची संवसारीक फुटबॉल सर्तींतली ही 21वी मॅच आशिल्ली. ताणे 21 मॅची खेळपाच्या अर्जेन्टिनाचो म्हान खेळगडो डिएगो माराडोनाच्या विक्रमा कडेन बोरोबोरी केली. अर्जेन्टिनान मॅक्सिकोचेर मेळयल्लें हें 11वें जैत आसा. 18 वर्सां आदी 2004 वर्सा कोपा अमेरिका सर्तींत मॅक्सिकोन अर्जेन्टिनाक 1-0 गोलांनी हारयल्लें.
लुसैल स्टेडियमाचेर शेनवारा रातीं जाल्ले मॅचींत अर्जेन्टिना खातीर लियोनल मेसीन 64व्या मिनटाक पयलो गोल केलो. 35 वर्सां पिरायंचो स्टॉर फुटबॉलर एंजेल डी मारियान दिल्ल्या पासाचेर मेसीन पेनल्टी बॉक्सा भायल्यान व्हो गोल केलो. संवसारीक फुटबॉल सर्तींतलो मेसीचो व्हो 8वो गोलो. एंजो फर्नांडोन 87व्या मिनटाक अर्जेन्टिनाचो दुसरो गोल केलो. ताका व्हो गोल करपाक मेसीन पास दिलो. बॉल गोलपोस्टा लागीं व्हरत ताणे हो दर्शनीय गोल केलो.
मेसीच्या पंगडान 7 संवसारीक फुटबॉल मॅची उपरांत क्लीन शीट केलां. हाचे पयलीं 2014 वर्याच्या संवसारीक फुटबॉल सर्तींत सेमी फायनलींत तांणी ही करामत केल्ली. तेन्ना नेदरलँड वांगडा तांची मॅच गोल जायनास्तना ड्रॉ जाल्ली. मात पेनल्टीचेर तांणी फायनलींत प्रवेश केल्लो.
मॅक्सिकोन संवसारीक फुटबॉल सर्तींत अर्जेन्टिना आडच्यो चारूय मॅचींत हार खाल्ल्या. ताचे आड सगल्यांत चड मॅचीत हार खावपाचे बाबतींत ते नायजेरिया फाटल्यान आसात. नायजेरियान अर्जेन्टिना कडल्यान पांच मॅचीत हार घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
