भांगरभूंय | प्रतिनिधी
दोन खेपेचो संवसारीक वस्ताद अर्जेंटिनान कतारांत चालू आशिल्ले संवसारीक फुटबॉल सर्तीचे प्री-क्वॉर्टरफायनलींत सुवात मेळयली. जर्मन क्लब पीएसजीचो स्टार फुटबॉलर लियॉनॅल मॅसीच्या फुडारपणाखाला खेळपी अर्जेंटिनान सी गटांतले आपले निमाणे मॅचींत पोलंडाक 2-0 हारयलो.
दुसरे वटेन मॅच वगडावन लेगीत पोलंड फुडले फेरये खातीर पात्र थारलो. जाल्यार सर्तींतले आपले पयले मॅचींत अर्जेंटिनाक हारीचो धपको दिवपी सावदी अरेबिया आनी मॅक्सिको ह्या पंगडांचें आव्हान सोंपलें.
पयली मॅच अर्जेंटिना आनी पोलंड जाल्यार दुसरी मॅच मॅक्सिको आनी सावदी अरेबिया ह्या पंगडां मदीं जाली. दुसरी मॅच मॅक्सिकोन 2-1 फरकान जिखली. पूण, जिखून लेगीत मॅक्सिकोक सर्तींतली आपली बिटकी कवळची पडली.
अर्जेंटिनान सी गटांत पयले सुवातेर रावन फुडले फेरयेंत प्रवेश केलो. जाल्यार पोलंड दुसरे सुवातेर उरलो. अर्जेंटिनाचे स आनी पोलंडाचे चार गूण जाल्यात.
मॅक्सिको आनी सावदी हांचे वळेरेन चार आनी तीन गूण जाले आनी ते वळेरेन तिसरे आनी चवथे सुवातेर उरले.
मजगतीं, स्टेडियम 974त अर्जेंटिना वतीन मॅक एलिस्टर आनी ज्युलियन अल्वारेज हांणी दरेकी एक गोल केलो. अर्जेंटिनान दरेक विभागांत बरें प्रदर्शन केलें. मॅचीची सुरवातूच ताणें आक्रमक पद्दतीन केली. मॅसीन सुरवातीच्या 10 मिनटांनीच गोल करपाचे साबार यत्न केले. पूण, पोलंडाच्या गोलकीपरान दोन उत्कृश्ट बचाव केले. ते उपरांत लेगीत अर्जेंटिनान आपले हल्ले चालूच दवरले. तरी आसतना पयल्या अर्दांत ताका खातें उगडपाक जमलें ना.
दुसऱ्या अर्दांतलो खेळ सुरू जायना फुडें एलिस्टरान अर्जेंटिना वतीन गोल केलो. ताचो हो पयलो आंतरराष्ट्रीय गोल थारलो. ते उपरांत 67व्या मिनटाक अल्वारेजान संवसारीक सर्तींतलो आपलो पयलो गोल करून अर्जेंटिनाची आघाडी 2-0 अशी केली.
ते उपरांत जाल्ले मॅचींत मॅक्सिकोन सावदी अरेबियाक 2-1 फरकान हारयलो. मॅचींतलो पयलो गोल हॅन्री मार्टिनान केलो. मॅचीच्या 47व्या मिनटाक करून मॅक्सिकोचें खातें उगडलें. ते उपरांत 52व्या मिनटाक लुईस चावेजान गोल करून आपल्या पंगडाक 2-0 अशी आघाडी मेळोवन दिली.
सावदी अरेबिया वतीन एकोडो गोल दुसऱ्या अर्दाच्या इंज्युरी टायमांत सलेम अल्डावसारीन केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
