भांगरभूंय | प्रतिनिधी
जोयडा : उत्तर कन्नड जिल्ह्यांतल्या यल्लापूर-कारवाराक जोडपी अरेबैल घांटांतल्या बलगार वाठारांत बिरेस्तारा सकाळीं एक सामको भिरांकूळ अपघात जालो. अंकोला-हुबळी राष्ट्रीय महामार्ग नंबर ५२ चेर एक वेगान वचपी ट्रक आनी क्रुझर हांचे मदीं नेटान धपको बसलो. ह्या धपक्यान क्रुझराचो चुरो जालो. ह्या अपघातांत सात जणांक जाग्यारूच आनी उपचारा मजगतीं मरण आयलें. जाल्यार दोग जाण हॉस्पिटलांत मरणा कडेन झुजतात. हे घडणुकेक लागून धारवाड वाठारांतूच न्हय पुराय राज्यभर दुख्ख पातळ्ळां. सोशल मिडियाचेर ह्या अपघाताचे फोटो आनी वृत्त पातळिल्ल्यान तरणाट्यांनी दुख्ख आनी चिंता उक्तायल्या.
हे विशीं मेळिल्ले म्हायती प्रमाण, मरण आयिल्ले सगळे तरणाटे धारवाड रावपी आशिल्ले आनी ते स्विगी कंपनींत पार्टटायम काम करून आपलें शिक्षण करताले वा कुटुंबाक मजत करताले. कांय दीस कामांवेल्यान लीव घेवन हे णवूय इश्ट तुफान क्रूझर गाडी भाड्यान घेवन धर्मस्थळ आनी मंगळूर भागांत पर्यटना खातीर गेल्ले. मात, अरेबैल घांटार बलगार लागसार एका धोक्याच्या वोल्तार मुखारच्यान येवपी एक व्हड ट्रकान तांच्या वाहनाक मुखारच्यान धपको दिलो.
ह्या अपघातांत चालक संजीव (संजय) अंगडी, बसवराज, अभिषेक ईश्वर, अक्षय, अभिषेक आनी मंजुनाथ चुलकी ह्या स जाणांक जाग्यारूच मरण आयलें. जाल्यार गंभीर जखमी जाल्ल्या सचिन नांवाच्या तरणाट्याक हॉस्पिटलांत उपचारा मजगतीं मरण आयिल्ल्या वट्ट मरण आयिल्ल्यांचो आंकडो साताचेर पावला. तशेंच शिवराज दुर्गप्पा मडिवाळ आनी चेन्नबसय्या बसलिंगय्या संपगाव हे दोगूय गंभीर जखमी आशिल्ल्यान तांचेर आयसीयूंत उपचार सुरू आसात. तांची भलायकी चिंता करपा सारकी आशिल्ल्याचें दोतोरांनी सांगलें.
हो अपघात इतलो खर आशिल्लो, क्रुझराचो फुडलो भाग हातूंत पुरायेन चिड्डल्लो. गाडयेंत आडकल्ल्या कुडींक आनी जखमींक भायर काडपा खातीर यल्लापूर पुलीस, महामार्ग गस्त पंगड, उजो पालोवपी दळ आनी थळाव्या नागरिकांक गॅस कटराची मजत घेवची पडली. ह्या अपघाताक लागून राष्ट्रीय महामार्गावेली येरादारी कांय काळ पुरायेन विस्कळीत जाल्ली. पुलिसांनी कुडी पोस्टमार्टेमा खातीर धाडल्यो आनी क्रेनीचे मजतीन वाहनां कुशीक करून येरादारी सुरळीत केली.
अरेबैल घांट सदांच खर वोल्तां, खोल देंगणां आनी पावसांत निसरपी रस्त्यां खातीर सामको धोक्याचो मानतात. ह्या अपघाताचें नेमकें कारण आजूनय स्पश्ट जावंक ना. तरी अती वेग वा वोल्ताचेर वाहनावेलें निर्यत्रण सुटिल्ल्यान हो अपघात जाला आसतलो, हे नदरेन यल्लापूर पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
