भांगरभूंय | प्रतिनिधी
नवी दिल्लीः दिल्लीचे मुख्यमंत्री अरविंद केजरीवाल हांकां दिल्ली सरकारच्या कथीत सोरो धोरण घोटाळो प्रकरणांत राऊस अॅवेन्यू न्यायालयान 15 दीस न्यायालयीन काेठडेंत दवरपाचो आदेश दिला. केजरीवाल आतां 15 एप्रील मेरेन कोठडेंत उरतले. तांकां तिहार बंदखणींत धाडपाची शक्यताय आसा. अंमलबजावणी संचालनालयान केजरीवाल हांकां काल न्यायालया मुखार हजर केले. कालचे सुनावणे वेळार ईडीन न्यायालया कडेन केजरीवाल हांच्या न्यायालयीन कोठडेची मागणी केल्ली. ही मागणी न्यायालयान मान्य केल्या.
अतिरिक्त सॉलिसिटर जनरल एस. व्ही. राजू हे ईडी वतीन न्यायालया मुखार हजर आशिल्ले. तांणी न्यायालया कडेन केजरीवाल हांच्या 15 दिसांचे न्यायालयीन कोठडेची मागणी केल्ली. कारण केजरीवाल हांणी चवकशे वेळार कसल्याच प्रकारचे सहकार्य करूंक ना. तांकां विचारिल्ल्या दरेक प्रस्नाचेर तांणी ‘आपणाक खबर ना’ इतलीच जाप दिली.
केजरीवाल हांणी ईडीच्या अधिकाऱ्यांक तांच्या फोनचो पासवर्ड सांगपाक न्हयकार दिलो. तांणी हेर खंयच्याच डिजिटल डिव्हायसचे पासवर्ड दिवंक नात. तशेंच ते खंयच्याच प्रस्नाक जाप दिवपाक तयार नात, अशें ईडीन न्यायालयांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
