भांगरभूंय | प्रतिनिधी
हणजूण पुलिशेंत वेवस्थापका आड गुन्यांव
म्हापशें: हडफड्यां ड्रीम इंटरटेन्टमेंट कंपनीचे कचेरेंतल्यान 9.75 लाख रुपया रकमेची अफरातफर करपाचो प्रकार घडलो. ह्या प्रकरणांत हणजूण पुलिसांनी दुबावीत दिनेश खंत (गुजरात) ह्या कचेरेच्या वेवस्थापका आड गुन्यांव दाखल केला.
हो अफरातफरीचो प्रकार चालू म्हयन्यांत घडलो. ह्या प्रकरणांत कंपनीचे अधिकारी हरिकेश सिंग हांणी पुलिशेंत कागाळ दिल्या.
ड्रीम इंटरटेन्टमेंट ह्या कंपनीचे थंडरवर्ल्ड नांवाचें अम्युझमेंट पार्क आसा. ह्या पार्काचो वेव्हार वयले कचेरे वतीन चलता. दुबावीत आरोपी फाटल्या सात वर्सां सावन वेवस्थापक म्हूण हे कचेरेचें काम पळयतालो.
चालू म्हयन्यांत कंपनीच्या खात्यांतल्यान दुबावितान सुमार 8 लाख 30 हजार रुपया रक्कम आपल्य वैयक्तीक खात्यांत घुंवडायिल्ल्याचो प्रकार कंपनीच्या अधिकाऱ्यांचे नदरेक आयलो. उपरांत दुबाविता कडेन कागाळदार आनी हेरांनी स्पश्टीकरण मागलें. तेन्ना दुबावितान कचेरेंत आशिल्ली 1 लाख 45 हजार रुपया रक्कम घेवन पळ काडलो.
ह्या कागाळीच्या आदाराचेर पुलिसांनी दुबाविता आड भादंसंच्या 408 कलमा खाला गुन्यांव नोंद केला आनी फुडलो तपास पुलीस उपनिरिक्षक आशीश पोरोब करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
