भांगरभूंय | प्रतिनिधी
नवी दिल्ली, खबरां संस्था ः 2022 ह्या एका वर्सात 66 हजार 960 भारतीयांनी अमेरिकेचें नागरीकत्व स्वीकारलां. हालींच जाहीर केल्ल्या ताज्या आंकडेवारी प्रमाण मेक्सिकोंतल्या सगळ्यांत चड नागरिकांचो आंकडो अमेरिकेंत आसा, जाल्यार दुसरे सुवातेर अमेरिकेंतल्या भारतीयांचो आंकडो आसा. हो डेटा सीआरएसान जाहीर केला.
दुसरे क्रमांकाची लोकसंख्या भारतीयांची
सीआरएस अहवाला प्रमाण, अमेरिकेंत 2022 वर्साच्या आंकडेवारी प्रमाण 1 लाख 28 हजार 878 मेक्सिकन नागरिक आसात, जाल्यार 65 हजार 960 भारतीय आसात. हे वळेरेंत तिसऱ्या क्रमांकाचेर फिलीपीन्स (53,413 नागरिक), क्यूबा (46,913), डॉमिनिकन रिपब्लीक (34,525), व्हिएतनाम (33,246) आनी चीन (27,038) ह्या देशांचो आस्पाव आसा. हे आंकडेवारी प्रमाण अमेरिकेंतल्या वट्ट लोकसंख्येंतल्यान 14 टक्के म्हळ्यार 40 कोटी 60 लाख लोक परदेशांतल्यान अमेरिकेंत स्थायीक जाल्यात.
2023 मेरेन अमेरिकेंतल्या भारतीयांची संख्या 28 लाख
मजगतीं, सीएसआरच्या आंकडेवारी प्रमाण 2023 मेरेन अमेरिकेंत स्थायीक जाल्ल्या भारतीयांची वट्ट संख्या सुमार 28 लाख 31 हजार 330 आसा. मेक्सिकोचो आंकडो 1 कोटी 6 लाख 38 हजार 429 आसा. जाल्यार चीनांतल्या नागरिकांचो आंकडो 22 लाख 25 हजार 447 आसा.
42 टक्के भारतीय नागरीकत्व मेळोवपाक अपात्र
ह्या आंकडेवारी प्रमाण सध्या अमेरिकेंतल्या वट्ट भारतीयांतले 42 टक्के भारतीय कायमचे अमेरिकेचें नागरीकत्व मेळोवपाक पात्र नात. देखून हे सगळे नागरिक सध्या तात्पुरत्या व्हिसाचेर अमेरिकेंत रावतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
