अमेरिकेंक जैत मेळोवन दिवपी सौरभ हाचें गोंयां कडेन खाशेले नाते

भांगरभूंय | प्रतिनिधी

पणजी, बातमीदार ः पाकिस्ताना आड जाल्ले टी- 20 विश्वचषक क्रिकेट मॅचींत अमेरिकेन जैत मेळोवन इतिहास रचलो. कर्णधार मोनांक पटेल हे मॅचीचो हिरो जालो पूण पाकिस्तानाक बॅकफुटाचेर धुकलपाक बॉलर सौरभ नेत्रावळकार हाणें म्हत्वाचो वांटो उखल्लो. सौरभ नेत्रावळकार हो अमेरिकन नागरीक आसलो तरी गोंयां कडेन ताचें वेगळेंच नातें आसा.
नेत्रावळकार कुटुंबाच्या लागीं आशिल्ल्या अशोक सिनाय नेत्रावळकार (ताळगांव) हांणी हे विशीं म्हायती दिली. श्रीपाद नेत्रावळकार हो सौरभाचो आजो. तो गोंयांत रावतालो. पूण शिक्षणाची बरी सुविधा नाशिल्ल्यान आनी कामाच्या सोदांत तांणी गोंय सोडले. गोंय पोर्तुगेज सत्ते खाला आसतना 1941- 42 वर्सा ते मुंबयंत गेले. मुंबयंत शिक्षण घेवन तांणी थंयच एका टेलिकॉम कंपनींत नोकरी मेळयली. मुंबयच्या मालाड शारांत ते रावताले. मुंबयंतले एके गोंयकार चलये कडेन ताचें लग्नय जालें. आयज तांचो नातू म्हळ्यार सौरभ अमेरिकेंत भारता सयत गोंयचें नांव व्हड करता अशें सिनाय नेत्रावळकार हांणी सांगलें.
सौरभ आनी ताचें कुटुंब वर्सांतल्यान एक फावटीं मंगेशी देवाक भेट दिवपाक येतात. अंदूं चवथीक तीं येतलीं अशें अशोक नेत्रावळकार हांणी सांगलें.
नेत्रावळकार 2010 वर्सा अंडर-19 विश्वचषकांत भारता खातीर खेळ्ळा. ताचो जल्म मुंबयंत जाला. संगणक शास्त्रांत अभियांत्रिकी शिक्षण घेतले उपरांत ताका अमेरिकेंतल्या कॉर्नेल विद्यापिठांत एमएस करपाक शिश्यवृत्ती मेळ्ळी.
सौरभ नेत्रावळकार अंडर-19 वर्ल्ड कपांत खेळलो तेन्ना ताणें जोस बटलर, ज्यो रूट आनी बेन स्टोक्स हांचे आड गोलंदाजी केली. अमेरिकेंत गेले उपरांत लेगीत नेत्रावळकार क्रिकेट पसून केन्नाच वेगळो जावंक शकलो ना. अमेरिकन क्रिकेटांत दर एका पांवड्यार बरी कामगिरी करून तो चर्चेत आयलो. क्रिकेट सोडल्यार तो सिलिकॉन व्हॅलींतल्या ओरॅकलच्या कार्यालयांत काम करता.
2024 वर्सा 32 वर्सां पिरायेच्या डाव्या हाताचो वेगवान बॉलर सौरभ हाची वट्ट संपत्ती 1 ते 20 मिलियन डॉलर आसा. हातूंत ताचो करिअरचो पगार, जायराती, कंत्राट आनी गुंतवणूक हांचो आस्पाव आसा. पूण ताचो पगार कितलो आसा हाचेर अजून अधिकृतपणान स्पश्टताय मेळूंक ना. पूण अमेरिकेंत क्रिकेट खेळपाक उण्यांत उणो पगार 15,080 डॉलर इतलो आसा.