अमीत शाह हांच्या विधानाचो कोरगांवां निशेध

कोरगांवचे ग्रामसभेंत उलयतना नागरीक. (निवृत्ती शिरोडकार)

भांगरभूंय | प्रतिनिधी

पेडणेः म्हादय न्हंये संबंदांत केंद्रीय गृहमंत्री अमीत शाह हांणी कर्नाटकांत केल्ल्या विधानाचो कोरगांवचे ग्रामसभेंत निशेध करपी थाराव मंजूर केलो. तशेंच उदक, रस्ते, मेगा प्रकल्प, पंचायत कायदो ह्या विशयांचेर नेटाची चर्चा जाली.

कोरगांव पंचायतीची ग्रामसभा सरपंच समील भाटलेकार हांचे अध्यक्षते खाला आयतारा देवीळवाड्या वयल्या श्री कमळेश्वर सभाघरांत जाली. ह्या वेळार माचयेर उपसरपंच कल्पिता कलशांवकार, पंच देविदास नागवेंकार, पंच अब्दुल नायक, तृप्ती नर्से, अनुराधा कोरगांवकार, उमेश च्यारी, दिवाकर जाधव, लौकीक शेट्ये, श्रद्धा कोरगांवकार, निरिक्षक सुभाष तळकार हाजीर आशिल्ले.

ग्रामसभेक सुरवात जावचे आदींच ग्रामसभा नेमा प्रमाण घेवची अशें सांगून लोकांनी हाजेरी उणी आशिल्ल्याचो मुद्दे उपस्थीत केलो. पूण ही ग्रामसभा नेमा प्रमाणूच जाता, अशें सचीव कोरगांवकार हांणी सांगलें.

कर्नाटक सरकारान म्हादय न्हंयेचे बाबतींत डीआरपी घेवपाचो निर्णय घेतला तो ताकतिकेन रद्द करचो, अशी मागणी सुदीप कोरगांवकार हांणी केली. तशेंच म्हादय बाबतींत कर्नाटकांत केंद्रीय गृहमंत्री अमीत शाह हांणी कर्नाटक सरकारा वटेन केल्ल्या विधानाचो जाहीर निशेध केलो. तशेंच भाजपा सरकाराचोय निशेध करपाचो थाराव मांडलो आनी तो ग्रामसभेंत सगळ्यांच्या मतान संमत केलो.

नवो ट्रान्सफोर्मर 200 केव्ही बसोवचे खातीर सुदीप कोरगांवकार हांणी, स्पीडब्रेकरांचेर धवे पट्टे रंगोवपा विशीं आनी भाईवाड्या वयले मसुंडेंत लांकडां उपलब्ध करची, अशे थाराव पंढरी आरोलकार हांणी मांडले. देवूळवाड्या वयले तशेंत पंचायत वाठारांतल्या रस्त्यांची दुरुस्ती करून ते हॉटमिक्स करचे अशी मागणी लोकांनी केली.

पंचायती वतीन खंयचीं कामां केल्यांत ताची म्हायती दिवची. रस्ते, उदक आनी वीज हे संबंदांत कसल्यो येवजण्यो आसात ताचीय म्हायती दिवची, अशी मागणी व्यंकटेश घोडगे हांणी केली. तेचवरी पंचायत वाठारांतले रस्ते खणिल्ल्यान धुल्लाचें साम्राज्य पातळ्ळा, ताचो लोकांक त्रास जाता. रस्ते खणपाचेर पंचायतीन नियंत्रण दवरचें, अशीय तांणी सुचोवणी केली.

माईण कोरगांवां मेगा प्रकल्प येतात. गांवांतल्या लोकांक उदकाची आनी विजेची समस्या आसा. पयलीं गांवांतल्या लोकांक सुरळीत वीज आनी उदकाची वेवस्था करची आनी उपरांतूच मेगा प्रकल्पांक मंजुरी दिवची, अशी मागणी व्यंकटेश घोडगे हांणी केली.

ग्रामसभेंत हेर साबार विशयांचेर चर्चा जाली. रामचंद्र गोसावी, विनिता मांद्रेंकार, सोनू तळवणकार, नरेश कोरगांवकार, जगदीश तोरस्कार, देवानंद गावडे, राजू नर्से आनी हेरांनी चर्चेंत वांटो घेतलो. पंच लौकीक शेट्ये हांणी उपकार मानले.